DILI, STLNEWS.co – Relasiona ho desizaun governu liu husi Sekretariu Estadu Juventude no Desportu (SEJD) katak, re-selesaun hikas ba atleta sira, tanba nee Federasaun Karatedo Timor Leste (FEKATIL) iha atleta nain 5, sira elimina tiha nain 2 no nain 3 mak sei ba kompete iha Sea Games Vietnam iha fulan Maiu tinan nee.
“Tuir desizaun neebe mak governu, Comite Olimpico Nasional Timor Leste (CONTL) no Konfederasaun Desportu Timor Leste (CDTL – sigla portugues) deside hamutuk, tanba nee mak Federasaun Karatedo rasik iha atleta nain 5, elimina tiha atleta nain 2 no nain 3 mak sei partisipa Sea Games tinan ida nee,” dehan Sekretariu Jeral Karatedo, Antonio Carlos ba jornalista sira iha CDTL, Dili, Segunda nee (11/04/2022) .
Nia dehan, impaktu ba la iha, maibe impaktu nee mak hanesan ba fali atleta ho federasaun sira tanba senti tristi.
“Ita mos tenki haree katak depende ba orsamentu neebe governu aloka, ita partisipa ho osan neebe iha. Se ita obriga ba maibe ba ho saida, hanoin ita mos tenki apoiu desizaun governu nian neebe mak bazeia ba orsamentu neebe iha, ita presiza redus atleta, atu nunee sira bele ba hotu,” katak nia.
Nia mos enkoraja atleta atu kontinua nafatin treinu, labele lakon vontade, tanba eventu laos mak ida nee, sei iha tan seluk neebe mak sei partisipa.
(mar)
