DILI, STLNEWS.co – Federasaun Atletizmu Timor Leste realiza kampionatu nasional, ho objetivu hodi halo selesaun ba atleta sira neebe mak atu partisipa iha kompetisaun Sea Games tinan nee.
Tuir Prezidente Federasaun Atletizmu, Afraino Xavier Amaral katak, tuir lolos nee kampionatu nasional realiza iha tinan 2021, maibe realizasaun nee muda fali mai iha tinan 2022.
Eventu nee importante tebes, ida mak deside ranking ba federasaun rasik, i nunee bele halo relatoriu ba federasaun internasional.
“Ita mos halo meius ida para selesiona atleta sira neebe mak atu projeta ba partisipasaun Sea Games, tanba ita hatene katak Sea Games tinan nee hela deit fulan 4 ona, tempu ida limitadu tebes, tanba ida nee mak mezmu ita ho kondisaun hanesan nee, maibe ita tenke realiza,” tenik Prezidente Federasaun Atletizmu Timor Leste, Afraino Xavier Amaral ba jornalista sira iha Estadiu Munisipal Dili, Kinta nee (20/01/2022).
Nia dehan, federasaun atletizmu sei esforsu ho treinador, assosiasaun, atleta sira, parte CDTL, governu, inklui CONTL tenke servisu pakote ida, nunee bele dezenvolve no promove atleta neebe mak tama ona klasifikasaun atleta nasional, atu nunee prepara sira nia kondisaun atu ba kompete ho dignu.
(mar)
