DILI, STLNEWS.co – Jurista Timor oan konsidera katak, insendiu neebe akontese iha edifisiu Estatal nee akontesimentu normal. Buat sira hanesan nee bele akontese iha neebe deit, maibe akontesimentu nee sai fali espekulasaun iha sosiedade, bainhira lider politiku balu aproveita halo fali deklarasaun iha publiku, tanba nee atu hatene klean, tenki iha investigasaun.
“Atu hatene motivu husi insendiu nee rasik, mak tenki iha investigasaun para hodi hatene kauza husi insendiu nee saida,” dehan Jurista Sergio Dias Quintas ba STL iha Dili, Domingu nee (02/04/2023).
Nia sublinha, husi akontesimentu nee polisia halo ona identifikasaun ba ema balu hanesan meiu nesesariu hodi hetan informasaun husi akontesimentu nee.
Tanba nee, klaru bainhira polisia halo ona identifikasaun nee kabe ba nia knaar tuir artigu 53 husi Kodigu Prosesu Penal. Kazu sira hanesan konforme polisia.
Maibe tuir Jurista nia haree, identifikasaun laos sujeitu deit ba ema sira neebe iha altura akontesimentu nee iha fatin hodi tau matan ba edifisiu, maibe inklui ba funsionariu ho nia hirarkia.
Sergio akresenta, aleinde investigasaun esterna tuir lo-loos husi Ministeriu Estatal rasik loke investigasaun interna, hodi harii ekipa investigasaun atu deskobre kauza husi akontesimentu nee, tanba sira rasik mak konhese diak sira nia ambiente. Husi investigasaun esterna no interna nia objetivu, atu deskobre kauza husi insendiu nee, karik husi investigasaun polisia nia mak hetan indisiu ruma konaba krimi tenki liu husi prosesu kriminal, karik iha investigasaun interna mak deskobre neglizensia ruma Ministeriu Estatal tenki foti prosesu disiplinar ba azente refere.
Tuir informasaun neebe STL asesu antes nee katak, depois de akontesimentu iha ona ekipa ida husi PNTL mak halo hela investigasaun, maibe too agora seidauk iha informasaun ruma konaba investigasaun nee lao too iha neebe ona.
(ter)
