Atua Grupu RNDJK, Laos PNTL Mesak

DILI, STLNEWS.co – Atu halo atuasaun ba Grupu Rezistentensia Nasional Defende Justisa no Konstitusional (RNDJK), laos serbisu Polisia Nasional Timor Leste (PNTL) nian mesak, maibe hetan apoiu ou komplementar husi Polisia Militar.

Komandante Jeral PNTL, Komisariu Faustino da Costa dehan, Polisia Militar laos apoiu PNTL agora deit, maibe iha tempu impase politiku mos kontinua apoiu PNTL, tanba lei seguransa hatete serbisu komplementar.

“Desde ita iha impase tinan kotuk nee, dala ruma Polisia Militar sempre apoiu PNTL nia atividade balun, lei seguransa hatete servisu komplementar bainhira nesesita ida nee”, hatete Komisariu Faustino ba jornalista sira, bainhira remata hasoru malu ho Prezidente Republika iha Palasiu Prezidente Nicolau Lobato, Bairru Pite, Dili, Kinta (03/09/2020).

Nia hatutan kona ba Grupu Rezistensia Defende Justisa no Konstitusional neebe mak atu halao asaun, Komandu kontaktu ho grupu nee iha loron 01 Agostu, hodi halo enkontru ho Komandu, maibe enkontru nee preve fali iha loron 02 mais Komandu halo fali atividade seluk, tanba nee muda fali ba iha tempu seluk.

“Dia 03 ekipa nee mai diskute ona oinsa mak preparasaun ba fatin mobilizasaun, maibe iha informasaun katak sira kansela sira nia planu ka sira nia atividade,” Komisariu Faustino esplika.*

Reportajen: Emerenciana Pinto

Editora: Carme Ximenes

LEAVE A REPLY

Please enter your comment!
Please enter your name here