Autoridade Munisipiu Dili Atensaun Ba Komunidade Iha Area Protejidu

DILI, STLNEWS.co – Asian Justice and Rights (AJAR) husu ba Ministeriu Justisa liu husi Diresaun Nasionál Terras Propriedades (DNTP) srvisu hamutuk ho Autoridade Munisipiu Dili atu tau atensaun ba komunidade sira neebe kontinua hela iha area protejida.

Kestaun nee hatoo husi Peskizador AJAR, Inocensio Xavier de Jesus ba STL iha Hotel Timor, Sesta nee (23/06/2023).

Nia dehan, fatin publiku sira neebe pertense ba zona protejidu labele dezenvolve liu-liu atu halakon nia valores neebe maka iha, maibe haree depois loron ba loron ema kontinua dezenvolve halo konstrusaun ba uma too Lagoa Tasi-Tolu, nee atu lakon tanba halo fali uma.

“Prezidente Autoridade Munisipiu Dili no autoridade sira iha neeba halo saida, ita nia autoridade suku, lider komunitariu sira parte meu ambiente, Terras Propriedades persiza tau matan ba ita nia komunidade sira no fo avizu ba sira labele hela iha area portijidu,” nia hatete

Nia tenik, seidauk iha lejislasaun, maibe ema sira atu kontrola nee ladun masímu, tanba nee mos esplorasaun ba ambiente tasi atu lakon.

Nia esplika, komunidade neebe hela iha area protejida konsientemente nee sala, faktu sala, faktu juridikamente nee sala, maibe situasaun obriga, situasaun ida agora nee halo tiha povu dezobidensia ba lejislasaun sira neebe mak iha.

“Komunidade sira kontinua hela iha neeba tanba nesesidade, sira hela iha Díli nee tanba sira servisu, ita kuandu haree didiak ema barak hela iha neeba servisu nain no estudante sira, tanba nee mak sira halo buat ida nee, nee nesesidade mak obriga,” nia esplika.

Nia informa, estadu oinsa mak distribuisaun politika publikas ba iha nivél kraik, se politika desentralizasaun ba programa Smart, IX Governu bele dezenvolve, mak desentralizasaun nee lori ona servisu prestasaun publiku ba iha kraik, signifika funsionariu publiku iha nasional mos dala ruma hakarak transfere ba servisu iha nia munisipiu rasik.

“Politika VIII Governu nian atu harii kondisaun ba ema hirak nee, aselera prosesu bairu foun, fatin governu identifika mak halidolar, tibar no kasnafar, hein took realizasaun programa nee nia kontinuasaun ohin loron too ona iha neebe, no hein governu mai bele haree ida nee, konsidera hanesan prioridade ida ba IX Governu,” nia deklara.

Nia koalia, hein politika ida governu agora mai nee, serake kontinua politika VIII Governu Konstitusional para atu hasai ema sira nee husi fatin nee ka kontinua mantein ho kondisaun saida, ida nee mak persiza haree.

Iha fatin ketak, Prezidente Autoridade Munisipiu Dili, Guilhermina Filomena Saldanha dehan, bainhira kolia konaba area protejida, koalia mos konaba planu ordenamentu teritorial, nunee dezde uluk governu tau ona informasaun katak, Lagoa Tasi-Tolu area protejida, haree husi ambiente no fatin istoriku.

“Se ita atu haruka komunidade hela iha neeba sai, nee prosesu boot, husi parte Autoridade Munisipiu Dili nian bainhira atu kontrola mak tenki servisu hamutuk ho Xefi Suku, Xefi Aldeia atu ba hamutuk ho Terras Propriedades ba iha terenu hodi identifika rai nee se nian,” nia esplika.

Nia hatutan, konaba estatutu Tasi-Tolu ninian nee Diresaun Terras Propriedades mak hatene, Autoridade Munisipiu Dili laiha kompetensia ba ida nee, maibe atu hasai komunidade hirak nee mak governu persiza desidi.

“Klaru komunidade sira hela iha area Tasi Tolu nee problema, maibe sira rasik mak tenki hatene fatin ida neebe mak tenki konstrui uma no fatin neebe mak labele halo uma, fatin nia ba halo nee ninia rai ka ba naran halo deit uma,” nia afirma.

Tanba dezafius, neebe AMD nia parte kontinua fo sensibilizasaun labele hela iha area protejida, labele hela iha area risku, maibe mentalidade Timor oan nee labele fera sira nia Ulun oinsa atu hanoin hodi lao tuir, ida nee mak susar.

(jen)

LEAVE A REPLY

Please enter your comment!
Please enter your name here