Avo Ana Haloot Ona Iha Semiteriu Kakaulidun

DILI, STLNEWS.co – Mate isin matebian Avo Ana Maria Fernandes de Vasconcelos haloot ona iha Semiteriu Kakaulidun, Suku Bairo Pite, Postu Administrativu Dom Aleixo, Munisipiu Dili, Domingu nee (05/09/2021).

Antes ba prosesu funeral mate isin matebian Avo Ana hahu ho misa tuku 11:00 OTL, neebe prezide husi xefe sarani Hosana, Dili, Rev. Moises A. da Silva no Xefe Sinodo iha Igreja Protestante iha Timor Leste (IPTL) Rev. Domingos Alves, S. Si.Teol no sarani sira iha matebian nia fatin.

Bainhira matebian Ana Maria to’o iha semiteriu simu ho hananu no orasaun tuir fiar hosana nian katak, “hau entrega ba Jesus Maromak”.

Iha biban nee Rev Moises A. da Silva hatete, ohin Ana Maria husik ona mundu no familia sei entrega mate isin ba rai, maibe esperansa tuir Jesus katak ema neebe mak mate sei rona Jesus nia liafuan.

“Ohin ita nia inan, ita nia avo, ita nia irma Ana Maria Fernandes de Vasconcelos husik ona ita, ita sei entrega mate isin ba rai maibe ita nia esperansa tuir Jesus nia liafuan hatete katak, ema hotu neebe mak mate sei rona Maromak Oan Jesus Kristu nia liafuan, no sira neebe rona lian nee sei hetan moris,” dehan nia.

Nia hatutan, ema neebe mak moris laiha ema ida mak hatene saida mak sei akontese ba idak – idak nia moris.

“Ita nia moris iha mundu rai klaran hanesan ho lalatak, maibe nia liafuan to’o rohan laek, tanba nia domin be hamutuk ita, oras to’o ona ita tau mate isin ita nia inan, ita nia tia, ita nia avo, ita nia irma Ana Maria Fernandes de Vasconcelos ba deskansa ikus nian,” katak nia.

Nia afirma liutan, ho laran haksolok iha nia fatin deskansa neebe mak familia tomak prepara iha fatin ida nee.

Avo Ana hakotu nia iis iha Hospital Nasional Guidu Valadares (HNG) Dili,  Kuarta kalan (01/09/2021) tuku 23.50 WTL. Avo Ana hakotu iis ho idade 107.

Husi Avo nia peregrinasaun ikus nee husi familia no amigu sira mos hato’o sentidu kondelensia ba familia enlutada sira.

Liu husi nota neebe diariu nee asesu, Prezidente Repúblika (PR) Francisco Guterres ‘Lú Olo no funsionáriu tomak hatoo sentimentu triste ba Xefe Kaza Sivil Francisco Maria Vasconcelos no família neebe lakon inan doben no edukadora neebe hakotu iis iha loron 01 fulan Setembru tinan 2021 iha HNGV Dili.

Avo Ana Maria Fernandes de Vasconcelos moris iha Postu Administrativu Uatu-Carbau, Munisípiu Viqueque iha loron 15 fulan Abríl tinan 1914. Avo Ana nia laen kaben Pastor Vicente de Vasconcelos fila hikas ona ba Aman Maromak nia kadunan lalehan iha tinan hirak liu ba.

Husi kazamentu Avo Ana ho Vicente de Vasconcelos rezulta oan nain lima (5) kompostu husi, Maria Filomena de Vasconcelos, Joana Maria de Vasconcelos, Francisco Maria de Vasconcelos, Abrão de Vasconcelos no Maria da Graça de Vasconcelos.*

Reportajen: Emerenciana Pinto/Julius Ora

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: