DILI, STLNEWS.co – Prezidente Republika (PR) Jose Ramos Horta hatete, joven ida ho naran Marito Gamboa husi Munisipiu Vikeke, nain ba Kmpanhia Bandidu Kualidade neebe matenek iha vida negosiu, fo servisu ba Timor oan lubuk, nia sai inspirador ba joven sira iha Timor Leste (TL).
Prezidente Republika hatoo kestaun nee ba jornalista sira bainhira remata halo enkontru ho Marito Gamboa iha Palasiu Prezidente Bairu Pite, Tersa nee (14/03/2023).
Nia hatete, se ema ruma hakarak hola kareta no motor ka trator ruma bele koalia ho Marito Bandidu kualidade, nia joven ida neebe halao bisnis ho idade 20, eskola iha Uatulari Vikeke no kontinua Universidade iha UNTL, maibe nia iha hanoin halo negosiu ohin loron susesu boot.
“Marito nia susesu ema estranjeiru mos hakfodak taka sira nia bisnis, tanba la konsege halo kompetisaun ho Bandidu Kualidade. Ema Xina, India, Portugues ema hotu taka, hakfodak, nia ema simples ajuda ema barak nia fo servisu direitu atus ida resin in-direitu tan mill, nee hanesan inspirasaun ida ba joven Timor oan sira, no nia sei sai boot iha liur iha Surabaya, Australia, no sai boot mos iha Xina,” katak PR.
Prezidente Republika afirma, Marito Gamboa mos durante nee apoiu ema kiak barak inklui mos fo bolsu ba estudante neebe inan aman kbiit laek.
Prezidente hatete, Marito nudar ema simples neebe hatudu nia homildade no laran diak ho matenek.
“Ohin hau simu Marito Bandidu Kualidade, tanba nia hakarak fo apoiu sosial ba programa prezidensial nian, klaru orsamentu boot prezidensia nia, entaun ajuda mos husi setor privadu hanesan Marito Bandidu Kualidade fo apoiu ami servisu hamutuk sebele karik hau lori Marito ba rai ruma hanesan Indonezia, Xina, Koreia do Sul, Dubai, hau sei lori aprezenta nia iha neeba,” katak PR.
Xefi Estadu hatete, tuir nia haree Marito hanesan mos Avo Nana, maibe Avo Nana matenek iha politika, no Marito Matenek iha vida negosiu.
Nunee mos Marito Gamboa nain ba Kompanha Bandidu kualidade hatete, ohin nia mai hasoru prezidente relasiona ona ho programa tulun ba ema kbiit laek sira. Tanba nee, nia mos hakarak tulun ema kbiit laek tuir nia kbiit neebe iha.
“Ohin ita marka prezensa iha nee tanba ita haree atividade senhor prezidente nia balun neebe liga ho atividade sosial sira, tanba nee ita mai koalia ho Prezidente Republika sobre buat balun neebe ita presiza fo tulun, ita fo ajuda ezemplu buat simples oan ruma neebe ita bele fo nee, bele fo,” katak nia.
Nia hatutan, temporariamente nesesidade saida mak aprezenta tuir kbiit neebe iha, buat neebe bele apoiu no ajuda Bandidu kualidade bele fo ajuda, ida neebe kbiit la too sei fo hatene, maibe daudaun nee koko ajuda tan ba programa sosial prezidente nian.
(eme)
