Banku Mandiri Fahe Prezente Natal-Tinan Foun Ba Labarik 60 Baixa Iha HNGV Dili

DILI, STLNEWS.co – Familia boot Banku Mandiri Dili xefia husi General Manager, Hari Nugroho Sujiono halao asaun karidade iha Hospital Nasional Guido Valadares (HNGV) Dili no Ofornatu sira iha Munisipiu Likisa hodi fahe prezente Natal-Tinan foun nian ba labarik 60 neebe baixa iha HNGV Dili no Ema ho Defisiensia hamutuk ema nain 17 iha Likisa.

“Ami hakarak fahe netik buat neebe ami iha, liu-liu ba labarik sira neebe luta atu hetan saude diak iha HNGV Dili ho esperansa katak ho  ajuda  nee bele fo forsa ba sira atu hetan rekuperasaun hosi moras neebe sira infrenta,” dehan Manager Banku Mandiri Dili, Hari Nugroho Sujiono ba STL iha HNGV Dili, Sabadu (2/12/2023).  

Xefe Banku Mandiri Dili dehan, apoiu nee  hanesan agradesementu ida ba buat neebe Banku Mandiri hetan no iha hodi fahe netik ba maluk sira neebe presiza hetan tulun iha neebe deit, iha teritoriu Timor Leste.

“Apoiu nee hanesan prezente Natal-Tinan foun neebe ami oferese ba labarik sira neebe agora dau-daun halao baixa hela iha HNGV Dili. Asaun karidade hanesan mos ami halao iha Munisipiu Likisa,” dehan Hari Sujiono.

Nia mos dehan katak prezensa Banku Mandiri nian iha nasaun ida  nee atu fo kontribuisaun ba dezenvolvementu ekonomia no fo garantia ba kliente sira neebe rai sira nia osan iha Banku Mandiri Dili.  

“Ami hakarak fo atendimentu diak ba kliente sira, fo garantia ba kliente sira neebe rai sira nia osan iha Banku Mandiri,  fo garantia iha servisu transaksaun finanseiru no seguransa finanseiru, inklui produtu sira neebe ami iha,” dehan Hari Sujiono. 

Entretantu, Xefe Komisaun Organizadora ba asaun karidade Banku Mandiri Dili, Tiago Bria da Costa hatete tinan-tinan, bainhira tama tempu Natal-Tinan foun ou loron boot ruma, Banku Mandiri Dili sempre halao atividade hanesan nee iha fatin-fatin, liu-liu ba maluk sira neebe presiza hetan tulun.

“Ba tinan ida nee, tuir ami nia rezultadu survey, ami halao asaun karidade iha fatin rua. Ida mak HNGV Dili, tanba labarik 60 neebe agora dau-daun halao hela tratamentu sira nia saude iha HNGV Dili presiza duni tulun. Alein de nee, ami mos halao asaun karidade hanesan ba Ema ho Defisiente nain 17 iha Ahisaun Likisa,” hatete Tiago.  

Tuir nia, razaun hili HNGV Dili, tanba pasiente sira nee laos deit mai husi Dili, maibe mai hosi munisipiu hotu iha Timor Leste. Maibe, apoiu nee espesial liu ba labarik sira neebe baixa hela iha HNGV Dili.

“Espera katak ho asaun karidade ida nee sira bele kontenti  no bele rekopera lalais hosi moras neebe agora dadaun sira infrenta hela, maske la barak maibe bele halo sira kontente,” tenik Tiago.

Iha fatin hanesan, Supervisor Servisu HNGV Dili, Jose Cardoso Amaral hato’o agradese wain tebes ba familia boot Banku Mandiri Dili neebe lori netik sasan mai HNGV Dili ba pasiente sira, liu-liu ba labarik sira neebe baixa hela iha HNGV Dili.

“Hau lori familia boot HNGV Dili nia naran hato’o agradese wain tebes ba familia boot Banku Mandiri Dili nia apoiu, maske la wain, maibe ami agradese tebes ba sira nia tulun,” dehan Jose Amaral.

Nia dehan, iha loron sabadu no loron friadu, supervisor servisu HNGV Dili mak toma konta situasaun tomak neebe akontese iha HNGV Dili. Tanba nee, bainhira Banku Mandiri Dili mai iha HNGV Dili, nia mak akompanhia sira no hatudu dalan ba sira hodi distribui sasan neebe sira lori mai atu fahe ba labarik sira.

(mik/koa)

LEAVE A REPLY

Please enter your comment!
Please enter your name here