DILI, STLNEWS.co – Bee moos importante ba iha komunidade sira, tanba nee sosiedade sivil husu IX Governu presiza tau atensaun seriu.
Kestaun nee hatoo husi Diretor Ezekutivu Forum Organizasaun Naun Governamental Timor Leste (FONGTIL), Valentim da Costa Pinto ba STL iha Kaikoli, Tersa nee (29/08/2023) hatete, governu presiza tau atensaun ba bee moos, tanba nee sai hanesan direitu baziku.
“Bee moos hanesan direitu baziku neebe tenki hetan ona oinsa mak uma kain iha teritoriu iha laran tomak bele asesu ba bee ida neebe mak diak no distansia neebe mak besik, nunee evita sidadaun lao oras barak hodi kuru bee, governu halo esforsu barak,” dehan Diretor FONGTIL.
Diretor hatutan, depois iha tinan 2 ba kotuk governu muda ona estatutu ba iha BTL–EP neebe ke halo esforsu makaas, tantu iha kapital Dili nomos iha munisipiu sira oinsa halo diak liu tan konaba sistema sira.
“Ita mos rekonhese katak, apoiu mai husi organizasaun internasional sira no NGO Internasional sira mos apoiu barak konaba servisu ida nee, ita hakarak governu hametin kordensaun too baze, nunee bele asegura ona katak, presiza tinan hira tan bele asegura uma kain hotu iha Timor laran tomak bele asesu bee ho diak, tanba purvolta kobertura nasional 75% ita purvolta 25% nee mak seidauk hodi halo esforsu liu tan,” katak nia.
Nia hatutan, FONGTIL mos aseita katak iha kapital Dili presiza tebes atu governu komesa halo ona pilotu ho sistema kanalizasaun ida neebe mak promove kualidade.
“Ita iha fatin balun hahu ona oinsa mak sistema tratamentu bee prienxe ona ho kualidade para permite ema hotu bele asesu ho diak, nunee ho neineik bele prevene ona maluk sira kuru bee dook nee redus ona katak nee labele nono bee, tanba ita rekolha ona reseitas sira mai husi uma kain sira neebe konsumu bee, no bee nee importante, rekomenda ida nee sai planu prioridade governu para ema hotu bele asesu ba bee ho diak, para redus inan feto sira neebe mak kuru bee dook, no labarik sira bele haris tuir tempu neebe mak iha,” katak diretor.
Nia hatutan, problema mal nutrisaun laos relasaun ba deit ai haan, maibe relasaun mos ho asesu bee moos, tanba husi bee mak fasilita ai haan ba familia uma kain.
Nunee mos Diretor HAK, Feliciano da Costa hatutan, governu mos presiza halo kooperasaun ho ajensia sira neebe mak servisu ba iha bee moos, nunee bele asegura bee moos ba komunidade sira.
“Presiza halo kooperasaun ho ajensia sira liu-liu liga ba asuntu bee moos, hau hanoin ida nee sai importante tebes ba iha asesu baziku nia ba iha komunidade, hau fiar katak IX Governu ida nee sei investe tebes ba iha asuntu bee moos, signifika katak iha 2030 ita nia komunidade bele asesu ona bee, laos bee deit, maibe bee ida neebe mak iha kualidade no sabor diak,” katak diretor.
Nia husu ba iha governu atu tau iha planu prioridade, nunee bele rezolve problema bee moos, nunee komunidade sira hotu iha Timor laran tomak bele asesu.
(eme)
