DILI, STLNEWS.co – Tuir Kondutor Mikrolet 010, Adelino Ximenes hatete, bemo 010 too 013 Segunda too Sesta lakohi tula pasajeirus estudante, tanba sira nunka muda sira nia distansia, dook no besik nafatin selu 0,15 sentavu, maski mina nafatin karun.
Nia dehan, mina solar no gazolina nafatin karun, tanba tula estudante husi area Balide mai too iha Rotunda 0,15 x 14 pesoas nee hetan US$ 2,1 (dois dólares e dez centavos), se tula funsionariu mak 0,25 x 14 pesoas US$ 3.5 (três Dólares e Cinquenta centavos).
“Ho nunee kondutor automatikamente hili liu tula funsionariu, lakohi hili estudante, tanba sira kontinua 0,15, pelumenus dook entaun tau konsiensia seluk netik 0,20 ba ita mos laiha,” hatete kondutor mikorlet 010, Adelino Ximenes ba STL iha Largo Lesidere, Sabadu nee (25/03/2023).
Nia esplika, pensamentu ida estudante nunka muda mak distansia besik ka dook nafatin 0,15 sentavu, pelumenus distansia besik 0,15 no dook aumenta tan 0,5 sentavu para sai 0,20 sentavu, katak selu husi estudante no funcionariu.
“Ita haree sira nia pakote internet kada loron 2 ka 3 sempre karega US$ 1, maibe tanba sa aumenta deit 0,5 sentavu labele,” nia esplika.
Iha fatin hanesan, Kondutor Mikrolet 02, Caudencio da Silva afirma, estudante sira nunka mais hanoin folin mina, maibe hanoin deit sira estudante, tanba nee mikrolet balun lakohi tula estudante, tula mak funsionariu.
“Estudante ami lakohi tula, komu hamrik hamutuk ho funsionariu sira entaun kareta para sira sae deit, sira nunka muda sira distansia dook ka besik, pelumenus besik sira selu 0,15 sentavu la problema, maibe dook pelumeus 0,20 sentavu, atu nunee ami mos kontenti tula sira,” nia infoma.
Nunee mos estudante Juvina dos Santos hatete, mikrolet barak mak lakohi tula estudante, tanba selu deit 0,15 sentavu, sira tula mak funsionariu tanba selu 0,25 sentavu.
“Ami selu 0,15 sentavu tanba DNTT hatete funsionariu selu 0,25 sentavu no estudante selu 0,15 sentavu, maibe sira lakohi tula ami, no balun tula,” nia afirma.
(jen)
