DILI, STLNEWS.co – Liu husi omilia Amu Joao Roque, SDB dehan, la kleur tan hakat ba eleisaun parlamentar, maibe iha kampanha gosta nega malu, dehan ida nee la halo no ida nee lalos ou ladiak, bainhira eroi barak mosu ona, nega tiha ema prinsipal hanesan Sao Pedro nega Jesus.
Bibi atan nee dehan, ohin Domingu resurreisaun ema hotu haksolok tama ho Jesus nia moris hias manan husi mate, Jesus la hela metin iha kruz ou la hela metin iha rai kuak no rate laran, maibe moris hias ona, haree ba Sao Pedro neebe nega Jesus ikus nia arepende no tanis, tanba nia nega ema neebe besik liu Nia, hanesan mos ema iha moris loron-loron dala ruma hirus malu no nega katak, ema nee la diak no ema nee la halo buat ida.
“Apalagi agora iha situasaun neebe besik eleisaun nee baibain nega malu tiha, dehan ida nee la halo no ida nee laos ou la diak, ema barak bainhira sai eroi barak mosu, i erois barak mosu ona nega tiha ema prinsipal, hanesan Sao Pedro nega Jesus, maibe ikus nia arepende no tanis halai fila fali, bainhira rona dehan Jesus laiha ona no rate mamuk,” dehan Bibi atan nee liu husi Omilia iha İgreja Parokia Maria Auxiladora, Comoro, Domingu nee (09/04/2023).
Amu Roque akresenta, entaun ho Jesus nia moris hias nee lori ona moris foun mai ema idak-idak, ho ema nia esperiensia desorienta no iha esperensia monu ba sala no moris iha nakukun, dala ruma mos iha loron bizila viasakra buka atu tuda malu no baku malu nafatin.
Bibi atan nee husu, entaun ohin ho Jesus nia moris hias nee, ba hahalok neebe tuan ninian hakohi tiha, atu nunee ho Jesus ninia moris hias atu ema idak-idak simu moris foun nee.
(dom)
