Biliba Agradese Ba PR Horta

DILI, STLNEWS.co – Sidadaun Biliba neebe hela iha Aldeia Maliboro, Suku Ailok, Postu Administrativu Kristu Rei, Munisipiu Dili, agradese ba Prezidente Republika Jose Ramos Horta, tanba bele vizita ona nia.

Aleinde nee mos entrega nesesidade baziku, no sei halo uma ba nia ho nia bei oan nain 4.

Sidadaun Biliba hatoo agredese nee ba jornalista sira, bainhira hetan vizita husi Prezidente Republika iha nia knaar fatin Aldeia Maliboro, Suku Ailok, Posto Administrativu Kristu Rei, Kinta (08/06/2023).

“Hau nia aman nasaun republika mai haree hau atu halo hau nia uma, obrigadu ba apa Ramos Horta mai haree hau nia kondisaun no asisti hau, tau matan hau, aman domin nain neebe hadomi povu hotu obrigado,” dehan nia.

Nunee mos Xefi Aldeia Maliboro, Suku Ailok, Postu Administrativu Kristu Rei, Aires dos Rego Senti kontenti, bainhira Prezidente Republika ho ekipa halo vizita ba nia sidadaun inklui mos fahe nesesidade bazika no sei halo mos kontrusaun ba sidadaun Biliba nia uma.

“Primeiru Vez hau nia fatin ida nee Prezidente Republika tun mai iha nee sente kontente, apoiu ba hau nia povu iha aldeia nee premeiru vez mak ida nee, avo nee ho nia beioan nain 4, no ferik hakiak nia beioan nain 4 tanba, nia aman mate tiha ona, no inan soe hela tan. Entau nia avo mak hakiak labarik nain 4 nee hodi ba eskola,” dehan nia.

Nia haktuir, iha vizita nee Prezidente Republika mos apoiu hahan nesesidade baziku ba Avo Biliba mak hanesan foos, mina, masi midar, kafe, nomos labarik sira nia sepatu ba eskola no seluk tan.

Nia hatutan, antes Prezidente mai Vizita asesor sosiedade Sivil mak ba vizita uluk tanba, haree fatin ladun diak tanba nee Prezidente deside halo mos uma ba Avo ho nia beioan sira.

Nunee mos Prezidente Republika Jose Ramos Horta hatete, husi Palasiu Prezidensia Republika sei halo hela uma ida ba Avo nee tanba durante nee nia hela iha tenda okos deit.

“Bele harii uma oan ida ba Avo tanba, agora dadaun nia toba hela tenda neeba, nia uma iha kraik neeba dook los entau situasaun antes hasoru difisil maibe hanesan mos apoiu ema lubuk ida iha Dili nomos elementu fatin seluk tan lubuk ida los, loron loron Prezidente nia staf ba mai iha Timor Leste laran para buka ajuda familia sira kiak, la konsege rejolve kompletu tanba, atu rejolve problema kompletu nee tenke ministeriu solidaridade sosial mak iha orsamentu para kada fulan mai haree ema sira nee,” dehan Horta.

Nia hatutan, serbisu sosial mak bele rezolve problema sira nee hahu husi Suku no Aldeia sira maibe, estadu haluha tiha sira nee. Maski laos mandatu prezidente nia, prezidensia laos solidaridade sosial maibe PR bele book orsamentu ruma ofisial estadu nia.

“Hau bele book orsamentu ruma estadu nia, orsamentu ruma liur nia kolega sira iha liur sira haruka para ajuda entau obrigasaun, hau labele hein governu, ema ruma araska situasaun susar hau fase liman nee problema governu nia lae nemos problema Prezidente, kuandu ema ruma hasoru problema susar tebes nee ita hotu nia problema ita hotu nia responsablidade,” katak nia.

PR hatete, laos apoiu ba inan feton nee deit maibe, sei kontinua apoiu mos ba ema neebe presiza tebes tulun.

(eme)

LEAVE A REPLY

Please enter your comment!
Please enter your name here