DILI, STLNEWS.co – Asidente entre bis ho trek neebe mak ohin meudia soke malu iha area Hera nian, rezulta pasajeirus balun kanek todan no baluk kanek kmaan.
“Ohin ami husi Vikeke mai Dili, maibe mai too iha Hera bis ho trek nee derepenti soke malu, entaun hau mos katik sai tiha husi vidru oin, maibe hau nia kondisaun diak hela, hau nia apa ho pasajeiru sira seluk mak kondisaun grave, neebe pasajeiru sira neebe mak grave nee lori hotu ona mai iha Hospital Nasional Guido Valadares,” informasaun nee hatoo husi pasajeiru Sejunho Costantinho Jordão de Aroujo Carvalho ba jornalista iha HNGV, Sabadu (19/08/2023).
Nia dehan, pasajeiru neebe ohin tama iha emerjensia nee iha ema nain 4 ka 5 hanesan nee, tanba sira grave, ba sira neebe mak kanek kmaan nee halo deit tratamentu iha Sentru Saude Metinaro.
“Iha asidente nee tuir hau nia hatene, pasajeirus nain 10 ba leten mak hetan kanek, maibe hau nia kondisaun diak. Hau nia pai mak nia kondisaun grave, neebe agora daudaun halo hela tratamentu iha HNGV,” tenik nia.
Nia afirma, kareta bis dirasaun husi Vikeke mai Dili, mai too iha Hera mak kareta trek husi Dili atu ba Vikeke mak soke malu iha parte Hera nian.
Tuir observasaun STL haree iha terenu katak, pasiente neebe mak hetan asidente iha Hera nee balun lori ona mai iha emerjensia HNGV nian, hodi hetan tratamentu intensivu.
(nat)
