Branco: Implementa Lockdown Iha Dili, Laos Bairru-Bairru

Prezidente Bankada FRETILIN, Francisco Miranda Branco. (Foto: Espesial)

DILI, STLNEWS.co – Xefe Bankada Fretilin, Francisco Miranda Branco hatete, implementasaun lockdown iha Munisipiu Dili laos iha bairru-bairru.

Tanba nee husu komunidade sira labele taka dalan, atu nunee karik iha emerjensia ruma hodi labele failla.

“Tanba nee lei determina konfinamentu serka sanitaria ka lockdown iha Dili, laos iha bairru-bairru, nee duni ita hotu tenke kumpri, laos idak-idak halo tuir nia hakarak. Ita la presiza taka dalan, tenke nakloke bainhira iha emerjensia ruma, ambulansia ho seguransa servisu sanitariu bele fasilita hodi lori ema neebe presiza tratamentu urjente ba iha ospital ka klinik,” dehan nia ba jornalista sira iha PN, Kinta (11/03/2021).

Nia dehan, povu ida nee ho lisan utradisaun neebe boot hakruk ba regras, uluk iha tempu neebe lei seidauk iha, hakruk ba saida maka lia-nain sira deside. Ohin loron lei maka aas liu ema hotu tenke kumpri, iha estadu de direitu demokrasia mos, laos libertinazen, laos idak-idak halo ninian tuir nia hakarak.

Nia afirma, se komunidade sira taka tiha dalan, oinsa ho servisu atendimentu rapida, nee labele rapida tanba obstaklu husi komunidade sira taka dalan.

Iha parte seluk, tuir observasaun jornalista STL katak, iha Suku Comoro parte Kampung-Baru komunidade sira hakarak prevene aan husi transmisaun Covid-19.Tanba nee komunidade sira iha bairru Sacrojes-Perumdis taka dalan hodi la simu movimentu trasporte inklui mos lao ain tama iha bairru laran.*

Reportajen: Maria Tavares/Efizenia Da Costa
Editora: Domingas Gomes

LEAVE A REPLY

Please enter your comment!
Please enter your name here