DILI, STLNEWS.co – Bee Timor-Leste Empreza Publiku (BTL, E.P) realiza serimonia asina kontratu ho kompanhia manan nain sira neebe sei implementa projetu konstrusaun sistema bee moos, fornesimentu no instalasaun prefabricated liner tank iha Postu Administrativu Laklubar, Munisipiu Manatuto.
Kestaun nee hatoo husi Presidente BTL, E.P, Carlos Peloi dos Reis ba jornalista sira iha salaun BTL,E.P Kaicoli, Dili, Kuarta nee (26/04/2023).
“Ita asina kontratu ho ita nia parseiru implementador rua, atu halo kanalizasaun bee moos, no instala mos tanki dezervatoriu sira kapital postu Laklubar nian,” nia hatete.
Nia esplika, espera katak iha semana ida ou rua sira bele mobiliza ekipa bele tun hodi halao servisu ba projeitu bee moos iha Laklubar.
Nia infrorma, iha projeitu rua sei implementa kanalizasaun nee, durasaun fulan 6 nia laran nomos instalasaun tanki dezervatoriu nee sei halo ba fulan 4 nia laran ho orsamentu US$ 656 mil resin.
“Projeitu rua nee nia orsamentu hamutuk US$ 656 mil resin, laos deit ita fornese komunidade sira iha parte Laklubar Vila, maibe ba instituisaun sira hanesan eskola, sede suku, Sentru Saude sira nee sei benefisiu husi projeitu ida nee,” nia esplika.
Iha fatin hanesan, Administrador Laklubar, Munisipiu Manatuto, Fansisco M. Soares esplika, kompanhia manan nain asina akordu ho governu liu husi BTL, E.P atu implementa projeitu konstrusaun sistema bee moos no fornesimentu no instalasaun prefabricated liner tank iha Postu Administrativu Laklubar, Munisipiu Manatuto.
“Ita asina ona akordu neebe kompanhia sira atu halo konstroi bee moos iha Postu Administrativu Laklubar, Munisipiu Manatuto nian, tanba durante nee ita nian komunidade sira iha neeba preokupa ho bee moos, tanba nee ninia finalidade asina kontrantu atu oinsa halo kontrusaun ba bee moos,” nia informa.
Nia hatete katak, bee moos nee uza hela, maibe uza tuir ida neebe iha, lo-loos estadu atu dada ba iha komunidade sira foin permeira vez akontese asina ona akordu manan nain ba projeitu refere.
Administrador nee fo hatene VIII Governu, tanba ho ninia mandatu bele halo ona asina kontratu ho BTL, E.P liu husi kompanhia sira para dada bee moos mai iha komunidade.
Nunee mos nain ba Kompanhia Twins Unipessoal, Lda, Agostihna Mendonsa informa, kompanhia seidauk tun ba terenu, maibe admistrasaun lao ona, sira sei halao projeitu nee fulan 6, maibe tarjeitu nee tinan ida.
“Husi ami nia kompanhia seidauk tun ba lapangan, maibe administasaun sira nee sei koalia, maibe ami nia servisu nee fulan 6, material sira seidauk kompletu tanba foin asina kontratu,” nia afirma.
(jen)
