DILI, STLNEWS.co – Prezidente Bee Timor- Leste Empresa Publika (BTL,E.P), Carlos Peloi dos Reis tristi, tanba komunidade baku tekniku BTL-E.P iha terenu, bainhira hadia hela bomba bee iha Bekusi.
“Hanesan lideransa instituisaun BTL-EP nian, hau senti tristi, kuandu komunidade baku staf BTL,E.P ida iha Bekusi. Ida nee laos primeira vez, maibe kuaze dala rua no dala tolu ona akontese, no ida nee mak loron-loron ami enfrenta,” dehan Carlos Peloi dos Reis ba jornalista sira iha salaun BTL,E.P Dili, Kinta (07/09/2023).
Nia dehan, falhansu bomba bee iha mota laran, tanba nee tekniku BTL,E.P koko atu hasai hodi hadia, tanba iha neeba balun liga bee ilegal.
Tanba nee, orienta tekniku sira ba hadia bomba bee nee, maibe komunidade baku tekniku sira, neebe agora husik hela hodi buka dalan kordena ho Autoridade Lokal sira para apoiu rezolve bee ba komunidade.
“Ita hakarak bee husi transmisaun too iha dezervatoriu bee nia volume neebe 100% too iha neeba, signifika ligasaun legal ita tenki hadia, maibe ida nee mak ita la hadia, la rezolve problema neebe lori bee ba ema hotu nee,” nia tenik.
Nia esplika, laiha kontribuisaun husi komunidade, MOP ho BTL,E.P mesak nee, la fiar katak lori bee moos nee ba komunidade ho diak.
Iha fatin hanesan, Ministru Obras Publika (MOP) Samuel Marcal iha Bairu Kuluhun neeba problema bee, maibe Sekertariu Estadu ho Presidente BTL,E.P hamutuk ho tekniku sira ba konsege rezolve problema bee.
“Depois iha problema fila-fali ho ita nian komunidade, tanba halo kuak fila-fali paralon bee nian, ita iha bee, ita laos laiha liu bee, mais ita nian problema mak ita nia sosiedade seidauk iha konsiensia ida diak para utiliza bee,” nia deklara.
Nia informa, kuaze 60% bee soe deit ba fatin sira neebe la utuliza, tanba iha fatin barak bee susar liu.
(jen)
