Caucus Prepara Feto Hasoru Dezentralizasaun

Diretora Ezekutiva Fundasaun Caucus Feto ba Politika, Terezinha Maria Noronha. (Photo: STL News/Emerenciana Pinto)

DILI, STLNEWS.co – Fundasaun Caucus kapasita feto, oinsa prepara sira hasoru Dezentralizasaun Munisipal, iha eleisaun tuir mai.

Diretora Ezekutiva Fundasaun Caucus Feto ba Politika, Terezinha Maria Noronha hatete, programa Fundasaun Caucus fokus liu oinsa prepara feto hasoru Desentralizasaun, tanba governu iha nia politika no ajenda oinsa atu realiza elisaun ba Kamar Munisipal nomos Asemblei ba Kamar Municipal.

“Iha prosesu preparasaun ida nee Fundasaun Caucus hamutuk ho Redi Feto, iha ona programa halo prepara atu suporta feto potensial sira neebe iha partidu politiku nia laran, oinsa ho sira hamutuk prepara eleisaun neebe mak atu mosu mai,” hatete Diretora Terezinha ba STL, iha nia knaar fatin, Caicoli, Dili, Kinta (10/09/2020).

Nia hatutan programa neebe prioridade mak empoderamentu politika ba feto ho atividade halo formasaun, treinamentu ba feto potensial sira iha nivel Munisipiu.

Fundasaun Caucus hahu ona iha tinan kotuk iha Munisipiu Ermera neebe hetan apoiu subsidiu orsamentu husi Governu Timor Leste liu husi Sekretariu Estadu Igualidade Jeneru, nunee mos iha tinan ida nee fundasaun Caucus hetan osan uitoan husi Embaixada Portugal.

Terezinha dehan iha fulan Setembru nia laran sei halao programa no formasaun ida nee iha Munisipiu Manufahi, iha mos esparansa katak ho formasaun sira nee komesa identifika ona feto potensial kada Munisipiu, hamutuk ho sira oinsa halo preparasaun iha Eleisaun Desentralizasaun.

“Tuir Caucus nia observasaun feto neebe mak partisipa iha eleisaun aas no makaas tebes, ita kompara ho eleisaun 2001, no iha eleisaun 2017-2018 ita haree katak feto nia partisipasaun ba iha prosesu votasaun nee aas tebes, kompara ho mane nee aas liu mane,” dehan nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here