Caucus Realiza Dialogu Interministerial Ho Feto Parpol

DILI, STLNEWS.co – Fundasaun Caucus Feto ba Politiku realiza dialogu interministerial entre lider feto partidu politiku (Parpol) ho topiku “Hametin Partisipasaun Feto Iha Politika Ba Eleisaun Neebe Demokratiku no Inkluzaun Iha Timor Leste.

Iha biban nee, Diretora Fundasaun Caucus Feto ba Politika, Terezinha Maria Noronha Cardoso ba jornalista sira iha salaun Delta Nova Tersa nee (22/08/2023) hatete, atividade ohin Fundasaun Caucus realiza dialogu interministerial ho partidu politiku sira atu hametin pensamentu involvimentu feto iha politiku.

“Atividade ohin halo dialogu entre linha ministerial ho lideransa feto iha partidu politiku husi jerasaun ba jerasaun, objetivu ida oinsa ita hametin nafatin pensamentu konaba involvimentu no partisipante feto sustentabilidade iha futuru husi jerasaun ida ba jerasaun seluk, husi ninia esperensia iha jornada politika ba feto maluk sira neebe progresu tebes iha sira nia vida, iha prosesu luta ba indepedensia no depois indepedensia sira kontinua haklaken kapasidade no konhesimentu ba feto maluk sira neebe iha,” dehan Diretora Fundasaun Caucus.

Diretora dehan, asuntu neebe mak prinsipal foti nafatin iha programa Fundasaun Caucus nia katak politika Igualdade Jeneru, politika oportunidade, empoderamentu ba feto no kualker ema ba sidadaun neebe deit sai ona ajenda ida integra ona iha planu estrateziku dezenvolvimentu pais ida nee nia.

“Atividade ida ohin nee laos sai hanesan atividade formal liu, maibe non formal atu ho ambiente ida neebe ita fasilita feto maluk sira atu konversa aberta liu fiar aan nakloke aan konaba dezafiu neebe kada feto partidu politiku enfrenta iha sira nia jornada iha vida politika, no oinsa atu aprende konaba obstaklu dezafiu sira neebe feto maluk sira enfrenta, tanba iha ema barak mai ho karakter neebe mak la hanesan,” katak Diretora.

Nunee mos Embaixadora TL ba Corea Sesante, Adalgisa Maria Soares Ximenes hanesan mos orador ba dialogu nee hatete, ohin nia mai fahe mos nia esperensia neebe mak durante nee nia halao ba iha feto maluk sira neebe mak inklina aan iha politika.

“Sira konvida hau mai atu fahe oituan esperensia ba feto maluk sira neebe mak inklina aan iha partidu sira, no hau fahe hau nia esperensia hahu husi kiik, no involve iha politika depois boot oituan, saida mak hau halao iha ukun aan nia, esperensia sira nee hau partilha, ikus liu atu dehan ba sira katak ho aprende halao daudaun mak ita foin bele iha rejultadu diak, hanesan feto atu bele involve aan iha vida politika,” katak nia.

Nia hatutan, esperensia neebe mak nia fahe liu-liu iha vida profisional hanesan feto, hanesan mos iha vida politika, hanesan mos iha vida domestika, hanesan familia, nomos vida iha sosiedade habelun no hadulur iha sosiedade, nunee feto politika sira bele hatene.

Nunee mos partisipante husi Partidu Os Verdes Timorense, Aurea da Concecao hatutan, mai tuir dialogu neebe halao husi Fundasaun Caucus Feto ba Politika nee oportunidade no esperensia neebe furak tebes ba nia atu aprende.

“Dialogu nee koalia konaba oinsa enkoraza feto atu partisipa iha vida politika no programa neebe involve feto iha laran, hanesan mos besik ona eleisaun suku oinsa motivu feto kompete,” katak nia.

Nia hatutan, bainhira dialogu hotu sei fila fali ba iha partidu laran hodi fahe mos matenek neebe nia hetan ba feto iha partidu laran atu kontinua lao ba oin nafatin, maski ho bareira neebe iha.

Iha dialogu Interministerial nee partisipa husi Feto partidu politiku sira mai husi Partidu CNRT, FRETILIN, PD, KHUNTO, PR, PVT, UDT, PLP, PR, PUDD, inklui mos Asosiasaun Feto husi Ermera nomos Asosiasaun Feto husi Bobonaro.

(eme)

LEAVE A REPLY

Please enter your comment!
Please enter your name here