DILI, STLNEWS.co – Relasiona ho atleta sira la konsege tama iha kazerna, tanba nee Konfederasaun Desportu Timor Leste (CDTL – sigla portugues) sei kontinua kontrola konsumu alimentasaun, inklui treinamentu ba atleta nasional sira husi modalidade hirak neebe mak atu ba kompete iha Sea Games Vietnam iha fulan Maiu tinan 2022.
Tuir Prezidente CDTL, Macario Sanches katak, CDTL reuniaun ona ho Sekretariu Estadu Juventude no Desportu (SEJD) no mos federasaun sira neebe mak atu partisipa Sea Games 2022 nian, husi diskusaun ida nee konsulta fali ho treinador sira no ofisial sira, opsaun ida neebe mak diak liu atu lori atleta sira ba kazerna, tanba dezde inisiu iha komunikasaun ida ho Centru Formasaun Polisia, atu nunee atleta sira bele ba konsentra iha neeba, para governu ho CDTL bele kontrola husi programa treinu.
“Ita fila fali halo avaliasaun i federasaun hotu – hotu konkorda katak iha deit sira nia fatin, tanba nee mak federasaun sira konsentra deit iha sira nia fatin, ita deside para konsentrasaun ai haan nian, atu nunee mezmu sira treinu iha fatin no hela fatin ketak – ketak, maibe tempu haan husi matabisu, haan meiudia snack, lokraik no haan kalan nian sira sei konsentra iha Ginaziu Desportu Dili,” tenik Macario Sanches ba jornalista sira iha CDTL, Dili, Segunda nee (11/04/2022).
Nia dehan, atu nunee sira bele hetan alimentasaun neebe mak nutritivu hodi kobre sira nia enerjia, neebe mak hasai durante treinamentu.
Iha sorin seluk, Sekretariu Jeral Karatedo, Antonio Carlos hatete, tuir saida mak CDTL prepara nee diak.
“Ami sei konsentra haan nian hotu, mai haan iha Ginaziu Desportu Dili,” dehan nia.
(mar)
