DILI,STLNEWS.co – Sentru Estudus ba Dame no Dezenvolvimentu (CEPAD) ho Uniaun Europeia halao serimonia enseramentu projetu konaba reforsa akontabilidade governu nian ba Covid-19 liu husi promove liberdade no asesu ba informasaun iha Timor Leste.
Nia dehan, projetu ne’e CEPAD implementa durante tinan rua, finansiamentu husi Uniaun Europeia hamutuk US$ 700 mil.
“Serimonia ida nee objetivu atu taka projetu ne’ebe finansia husi Uniaun Europeia ba tinan rua hamutuk ho CEPAD, hodi hatan ba liberdade asesu informasaun husi parte sosiadade tomak iha tempu Covid-19, no susar laran inklui krizi ruma ne’ebe tuir mai” dehan nia.
Hatete Diretor Ezekutivu CEPAD, João Boavida ba jornalista sira iha salaun CEPAD Bidau, Dili, Kinta nee (27/04/2023).
Nia esplika, sidadaun Timor oan hatene katak, iha konstituisaun artigo 40 iha ne’eba, loke dalan nudar sidadaun Timor oan, iha direitu atu hatene husu no simu informasaun husi orgaun estadu nian.
Nia deklara, projetu ne’ebe ajuda atu hakle’an sira nia konhesimentu, ne’e obrigasaun sira nian, atu fo informasaun ba sidadaun sira bainhira sidadaun sira husu.
Iha fatin hanesan, reprezentante Embaixador Uniaun Europeia iha Timor–Leste, Marc Fiedrich esplika, Uniaun Europeia suporta povu Timor-Leste liu husi meius oin-oin, inklui liu husi organizasaun sosidade sivil.
“Hau kontenti tebes mai hamutuk iha ne’e ohin dadeer, hodi partisipa iha serimonia enseramentu projetu,” nia esplika.
Nia tenik, atu asegura governu nia akontabilidade ba Covid-19 no hadia liberdade no asesu ba informasaun iha Timor-Leste (TL), ne’ebe finansia husi Uniaun Europeia.
Nia deklara, asesu ba informasaun ne’e importante tebes, atu nune’e sidadaun sira bele hato’o sira nia lian, asesu ba informasaun nu’udar valor fundamental ida husi direitu umanu no demokrasia.
(jen)
