Cidalia: Inundasaun Lori Triste Boot Ba Komunidade

Espoza Prezidente Republika, Cidalia Nobre Mouzinho Guterres, hatete, inundasaun lori triste boot ba komunidade sira, liu-liu sira neebe mak lakon familia. (Foto: STL/Emerenciana Pinto)

HERA, STLNEWS.co – Espoza Prezidente Republika, Cidalia Nobre Mouzinho Guterres, hatete, inundasaun lori triste boot ba komunidade sira, liu-liu sira neebe mak lakon familia.

Cidalia hatoo kestaun nee bainhira halo vizita ba komunidade sira neebe mak afeita ba inundasaun, neebe mak oras nee halo refuziadu iha Seminario Canossiano Bedik Hera nomos Escola Mota Kiik, Suku Hera, Kuarta (07/04/2021).

Inan ba nasaun nee hatutan, inundasaun neebe mak akontese iha loron Sabadu too Domingo semana kotuk halo ema hotu paniku no laran triste, liu-liu ba sira neebe mak lakon familia.

“Inundasaun nee halo ita laran taridu, triste liu mak sira neebe mak lakon familia, sira neebe mak salva aan no salva familia nee ita agradese tanba ita sei moris.” hatete Espoza.

Cidalia hatutan, akontese tristeza nee laos iha fatin ida deit maibe kuaze akontese iha Timor laran tomak. Nia mos enkoraza ba sidadaun sira hotu atu kontinua natan moris neon nain nafatin no kuidadu aan nafatin tanba seidauk hatene los bainhira mak udan nee para lolos.

Nunee mos Xefe Aldeia Ailok Laran, Rafael Soares Ribeiro, hatutan, akontese inundasaun nee halo sira sente triste no laran moras tebes tanba hamate nia sidadaun nain tolu.

“Hau sente laran triste no laran moras tanba asidente nee mosu iha hau nia area kedas no komunidade nain tolu mate iha hau nia sorin kedas, maibe iha akontese nee atu husu ajuda ba se ema latau matan, liu liu marina besik los ami nia fatin husu ajuda ba marina atu ajuda maibe marina nunka fo kolaborasaun atu ajuda populasaun, atu ba fali sorin mos laiha no uza tali ruma atu salva populasaun mos laiha hau rasik fo aan ba mate hodi salva populasaun.” dehan nia.

Nia hatutan lolos nee Forsa Naval ajuda vitima sira, tanba estuda buat barak maibe sira labele tun salva povu ou populasaun sira.

Nia hatutan nia populasaun neebe mak afeita ba inundasaun hamutuk 349 xefe da familia no xefe da familia 177 mak hela iha Salaun Canosiano no 166 xefe da Familia mak refujiadu iha igreja.

“Iha hau nia Aldeia rasik iha vitima nain tolu, inan ho oan nomos kolega Forsa ida mos nia oan mota lori too agora buka lahetan, bin ho nia oan nee agora buka hetan ona no sira lori ba laga ona hakoi ona no Forsa nia oan mak too agora seidauk hetan, tanba nee mak komunidade ba kee hela rai keta rai taka karik, maibe rezultadu seidauk hetan.” katak Rafael.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here