Cinzas Sinal Neebe Sarani Simu Iha Rentos

Pe. Richardo Pasang, SVD. (Foto: Espesial)

DILI, STLNEWS.co – Kuarta Feira Cinzas hanesan sinal ida neebe sarani sira simu iha rentos, hodi loke odamatan ba tempu kuaresma no tempu paskua.

“Hakribi imi salan no fiar Evangellu ita rai rahun sei fila henesan rai rahun, nee mak liafuan neebe ita rona iha Kuarta de Cinzas, hahu tempu kuaresma wainhira ita simu ahi kedesan neebe tau iha ita nia ulun ou rentos durante loron haat nulu nia laran,” hatete Padre Richardo Pasang ba STL, liu husi telefone, Kuarta (17/02/2021).

Padre nee hatutan, orasaun jejun no fo esmola, virtude tolu neebe sei sublina iha tempu kuaresma. Ho ida nee, ita sei hetan salvasaun plenaria iha ita nia moris, Jesus fo hanoin mai ita iha tempu kuaresma nia laran katak wainhira ita halao virtude tolu orasaun, jejun e fo esmola, ita halo ho esprito subar-fatin,” hatete Padre nee.

Nia hatete, maromak diak no laran luak tebes, iha Segunda leitura, São Paulo husu ba ema hotu atu entrega-an tomak hodi badame malu ho maromak.

“Iha Primeira leitura, Profeta Joel husu ita atu hakribi ita nia salan sira. Signifika katak ita nakfilak-an totalmente ba Maromak ho fuan no laran tomak. Fila imi laran ho neon mai hau, hodi hadera-an, hodi tanis no halerik. Fila imi laran ho neon tomak ba imi nain ba imi nia maromak,” tenik nia.

Bibi Atan Kreda Katolika nee dehan, Jesus hakarak atu virtude tolu nee sai hanesan dalan atu ema ho hakarak no konsensia hodi hasoru maromak. Jesus nia hakarak ida nee mos relevante ho situasaun agora neebe akotesimento saida deit ema hakarak hatudu iha medsos, hakarak hatudu nia rikusoin mundu nian no mos atributu spiritual hanesan orasaun no jejun.

Ema tenke kuidadu atu la bele monu ba hakarak gostu de se exibir (suka pamer). Nunee mos orasaun, jejun e fo esmola laos social show maibe hatudu ema nia disposisaun interior atu nakfilak-an. Nee duni, halo buat hotu iha idak idak nia subar-fatin. Nai Maromak hatene buat hotu neebe halo, sei haraik buat hotu ba ema idak idak.

“Maromak laran luak, haraik ita boot nia Espirito Santo hodi tulun ami atu bele hakribi ami nia salan tomak iha tempo kuaresma ida nee. Amin,” Padre nee hakotu.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here