DILI, STLNEWS.co – Centro Nacional Chega (CNC) ho nia ekipa hatoo kongratulasaun ba Prezidente Parlamentu Nasional (PPN), Maria Fernanda Lay, nudar feto dahuluk neebe hetan fiar lidera segundu orgaun soberanu iha Timor Leste.
Tuir Diretor CNC Hugo Maria Fernandes katak, ohin CNC ho nia estrutura tomak, hahu husi estrutura ezekutiva no estrutura administrasaun nomos husi konselhu asesoria internasional neebe mak tinan ida nee mai iha PN.
“Primeriu ami halo enkontru kortejia ho PPN atu kongratula nia neebe mak eleitu nudar PPN, ho nia esprensia nudar deputada iha tempu naruk, ami mos hakarak kongratula nudar feto Timor nian ida neebe mak hetan fiar hodi lidera orgaun soberanu ida nee,” dehan nia ba jornalista sira hafoin remata soromutu ho PPN iha PN, Segunda (17/07/2023).
Nia afirma, iha oportunidade nee atualiza mos servisu neebe mak CNC halo tiha ona ho apoiu neebe mak mai husi konselhu asesoria internasional, neebe sira mai husi nasaun oin-oin ho sira nia matenek neebe idak-idak nian, mai husu ba PN atu kontinua fo apoiu ba CNC ninia servisu sira ba tinan hirak neebe mai.
“Ikus liu ohin ami mos husu ba PN atu tau matan ba asuntu servisu reparasaun nian ba vitima sira, aprova rezolusaun konaba ema lakon, nomos husu atu bele halo esforsu ida ba Ministeriu Administrasaun Estatal (MAE) atu aprezenta lalais lei arkivu mai iha parlamentu, para bele hetan lalais aprovasaun iha PN,” nia sublina.
Entretantu, Prezidente Parlamentu Nasional (PPN), Maria Fernanda Lay, ninia parte rekonhese katak, tinan hirak ba kotuk konaba reparasaun iha tiha ona dekretu lei, maibe tuir mai lakon tiha, tanba nee parlamentu husu ba CNC bele aprezenta fila fali, depois sira bele diskuti.
Nia hatutan, nunee konaba lei arkivu mos hanesan, depois konaba pedidu parlamentu atu ratifika konvensaun konaba ema lakon, maibe ida nee sei tama ba iha diskusaun detalha liu tan ho komisaun espesializada sira.
(dom)
