DILI, STLNEWS.co – Komisaun Nasional Eleisaun (CNE – sigla portugues) no Servisu Tekniku Administrasaun Eleitoral (STAE) sei diskuti jornalista sira nia asesu ba vota iha kualker fatin neebe sira halao kobertura ba.
Hatete Prezidente CNE, Jose Agostinho Belo ba jornalista sira iha salaun CNE Dili, Kinta nee (13/04/2023).
“Imi nia preokupasaun ita sei diskuti hela, solusaun saida mak diak ba imi jornalista sira,” nia dehan.
Nia informa, CNE ho STAE sei aprezenta regulamentus no sei koalia oinsa jornalista sira bele asesu vota iha fatin neebe deit.
“Too agora ita seidauk bele koalia ida nee, tanba STAE sei aprezenta regulamentus, liu-liu prosedimentu sira nee, ita seidauk apresia, tanba iha prioridade ita seidauk koalia,” nia esplika.
Iha fatin ketak, Ministru Administrasaun Estatal (MAE), Miguel Pereira de Carvalho deklara, uluk iha eleisaun prezidensial introdus mudansa sira relasiona ho alargamentu orariu funsionariu ba sentru votasaun iha teritoriu nasional.
“Hau hanoin permisaun ba jornalista sira iha servisu kobertura, jornalista eleisaun parlamentar hodi vota iha sentru votasaun neebe mak ita nian jornalista sira halao kobertura ba,” nia informa.
Nunee mos, Akademista UNTL Joao dos Santos informa, CNE no STAE tenki buka solusaun, atu nunee sira bele asesu ba vota, tanba sira mos halao knaar neebe importante ba povu no nasaun ida nee.
“CNE ho STAE tenki buka solusaun ba ita nia jornalista sira para vota iha fatin neebe deit, tanba sira halao kobertura nee fo sai informasaun ba nasaun no povu ida nee, sei ita haruka ba munisipiu, entaun sira labele halo kobertura ona ba ita nia atividade eleisaun, tanba ita hotu hatene katak, jornalista sira nee foho oan hotu,” nia afirma.
(jen)
