CNRT Enkontru Alargada Ba Mapamentu Politika

Partidu CNRT halao enkontru alargada ba mapamentu politika 2021, no halo avaliasaun ba lalalok partidu nian iha 2020 ba kotuk. (Foto: STL/Donaciano Magalhães)

DILI, STLNEWS.co – Partidu CNRT halao enkontru alargada ba mapamentu politika 2021, no halo avaliasaun ba lalalok partidu nian iha 2020 ba kotuk. Kestaun nee husi Primeiru Adjuntu Sekretáriu Jeral no Sekretariu Ezekutivu, Jacinto Rigoberto ba jornalista, Kuarta (23/12/2020) iha Hotel Novo Turismo bainhira remata enkontru alargada partidu CNRT.

“Ohin partidu CNRT liu husi orientasaun prezidente partidu komvoka enkontru alargada ida neebe mak partisipa husi CPN sira hotu, CDN husi prezidente ho estrutura nasional hotu, OMP, OJP ho komisaun partidu nian 2, hanesan fiskalizasaun ho juridisaun hamutuk ho munisipiu 12 inklui mos RAEOA hodi diskute planu partidu nian ba tinan 2021, liu-liu atu halo avaliasaun ba lalalok partidu nian iha tinan 2020 ba kotuk hodi hasai desizaun, depois halo avaliasaun atu nunee diskute ba mapamentu politika CNRT nian ba nivel territoriu laran,” informa Jacinto.

Nia dehan, partidu ohin foti desizaun atu komvoka konferensia sub nasionais iha Timor laran hahu iha 2021 ba too iha konferensia nasional neebe sei deside tuir mai. Nebee kona ba planu ba 2021 nee mak atu halo kalendariu, neebe husi munisipiu sira sei aprezenta ba CDN ho CPN kona ba atu halo konferensia sub-nasionais.

Enkuantu kona ba atu iha mudansa estrutura, nee iha konferensia sub-nasionais mak deside mandatu ba iha kuadru sira iha nivel sub-nasionais sira, atu nunee partidu bele konsolida aan prepara diak liu tan ba eleisaun neebe sei mai.

Enkuantu observasaun jornalista STL haree katak, enkontru alargada partidu CNRT nee hahu iha tuku 10 dadersan too kalan tuku 7 liu foin remata.

Entretantu iha enkontru alargada nee dirije direitamente husi Prezidente Partidu CNRT, Kay Rala Xanana Gusmão, no partisipa tomak husi estrutura nasional no munisipal partidu CNRT nian husi munisipiu 12 inklui RAEOA.

Iha enkontru dadersan too kalan nee konfedensial, too remata enkontru foin halao konferensia imprensa husi estrutura sira hanesan Primeiru Adjuntu Sekretáriu Jerál e Sekretáriu Ezekutivu, Jacinto Rigoberto no mos Prezidente CDN, Dionísio Babo Soares, maibe Prezidente Partidu CNRT Xanana Gusmão lakoalia ba media.*

Reportajen: Guilhermina Franco/Donaciano Magalhães
Editor: Ekipa STL

LEAVE A REPLY

Please enter your comment!
Please enter your name here