CNRT Konsidera Meza Laimparsial, Mandati: Direitu Opozisaun

Bankada CNRT iha Prezidente Parlamentu Nasional, konsidera prezidente meza la imparsial, tendensia ditadura, no hamate direitu opozisaun. (Dok: STL)

DILI, STLNEWS.co — Bankada CNRT iha Prezidente Parlamentu Nasional, konsidera prezidente meza la imparsial, tendensia ditadura, no hamate direitu opozisaun.

Liu husi karta Komunikadu imprensa, Tersa (06/10/2020) iha PN, halo justifikasaun ba pozisaun CNRT nian liu husi votus abstensaun Bankada CNRT iha aprovasaun proposta OJE 2020 iha sesaun jeneralidade, Sesta (02/10/2020).

Bankada CNRT lo-loos no mo-moos atu manifesta boa-vontade deputadus CNRT nian hodi kontribui ba dinamika diskusaun iha espesialidade tuir mai.

Maibe iha audiensia ho membru Governu sira la konvense konaba aumentu orsamentu too 21,4% tuir tabela ezekusaun duo-desimal nian, inklui mal gastu osan iha rubrika tekniku profesionais tuir liña ministerial hamutuk U$78 millaun dolares atu rekruta funsionariu politiku.

“Ami deskobre iha prosesu diskusaun hatudu programa neebe laos ministeriu sira mak halo nunee laiha koñesimentu ministeriu ba orsamentu nia ezistente,” haktuir bankada CNRT iha karta komunikadu nee.

Laos nee deit, katak komunikadu nee pedidu orsamentu la reflete ba kapasidade governu nian, sei labele atu ezekuta osan U$ 759 millaun iha fulan rua nia laran. Sera governu nee sei halo deit milagre ka hanesan bai-bain, sei halo deit transfere ba mai hodi ezekuta lalais.

Tuir relatoriu ezekusaun iha fulan sia nia laran, governu so iha kapasidade ezekusaun 49% (U$526,9 millaun) husi total despeza duo-desimal nian ho montante 1.241,5 biliaun de dolares Amerikanus.

Bankada CNRT akrenseta katak, abstensaun CNRT nian iha aprovasaun OJE 2020 tanba mos haree ba kestaun legalidade governu ida nee, hanesan governu de faktu, Inkonstitusional tanba harii husi violasaun Konstituisaun no lei Organizasaun funsionamentu administrasaun Parlamentar (LOFP), nunee mos sub-misaun proposta OJE 2020 viola Lei Orsamentu no Jestaun Finanseira nian.

Iha debate loron rua iha plenária husi loron 01 – 02 de Outubro de 2020, kontinua mosu violasaun oi-oin, deputadus sira simu ameasas, diskriminasaun iha jestaun plenaria nian, no simu insultus, akuzasaun no provokasaun hasoru deputadus CNRT iha plenaria PN.

Bankada CNRT manifesta ninia lamentasaun, no kondena makaas hahalok neebe la etika, tanba halo ameasa bainhira eletrisidade iha sala plenaria mate, hodi hasai liafuan “tem os dias contados” ka konsidera katak, “hein sura loron deit ona”.

Ameasa sira nee atu dirije ba sé? Tanba maneira PPN ilegal dirije plenária ne’e halis liu ba partidu no nia governu viabilizadu de faktu no Inkonstitusionál.

Bankada CNRT konsidera hahalok prezidente meza nian neebe la imparsial, maneira ditadura hamate direitu opozisaun atu halao demokrasia iha PN neebe garania iha artigu 70, Konstituisaun RDTL.

Meza mos diskrimina deputadu opozisaun sira atu halo intervensaun, la fo tempu pontu de ordem nian, maibe iha tempu hanesan fo pontu de ordem ba deputadu sira husi Fretilin. Ita hatene momoos orgaun estadu sira seluk agora lakohi foti ona responsabilidade no defeza ba violasaun grave hasoru ita nia Konstituisaun RDTL no Leis sira.

Bankada CNRT husu ba atu órgaun estadu ida nee, PN nafatin iha vontade hodi defende Konstituisaun RDTL no Lei sira, asegura Timor-Leste nia soberania no defende Timor Leste ninia rikusoin.

Hatan ba karta komunikadu nee, Deputadu husi Bankada Fretilin David Dias Mandati hatete, CNRT kestiona nee tanba nuudar bankada opozisaun nia direitu. Maibe fo tempu ba bankada governu, ba bankada opozisaun lae, ida nee atu fo, ka la fo mos sira sempre koalia hanesan nee.

“Sira kestiona nee sira nuudar opozisaun nia direitu no papel atu koalia hanesan nee,” tenik Mandati.*

Reportajen: Guilhermina Franco/ Domingas Soares
Editor: Ekipa STL

LEAVE A REPLY

Please enter your comment!
Please enter your name here