CNRT Lidera Votus Iha Munisipiu Aileu

DILI, STLNEWS.co – Kontajen votus iha Munisipiu Aileu finaliza ona iha apuramentu munisipal, Partidu CNRT mak lidera no rezultadu submete tiha ona ba nasional.

Haktuir Administrador Munisipiu Aileu, Abel da Conceição katak, hakarak informa konaba kontajen votus Aileu finaliza ona, partidu neebe mak hetan votus maioria mak CNRT, tuir FRETILIN, tuir KHUNTO, tuir PLP, tuir PD.

“CNRT manan ho votus 14 mil resin, FRETILIN hetan iha 5 mil resin votus, tuir fali KHUNTO, PLP no PD no sira seluk tan, tanba hau seudauk simu dadus kompletu, tanba nee atu hatene liu komfirma ho STAE Munisipiu Aileu nian, para bele fo dadus kompletu”, informa Administrador Munisipiu Aileu, Abel da Conceição ba STL, Segunda nee (22/05/2023) liu husi telefone iha Aileu.

Enkuantu, konaba situasaun iha durante periodu kampanha mai too iha eleisaun too apuramentu munisipal, iha Aileu buat hotu lao diak, laiha problema balu hahu husi kampanha mai too ohin loron.

“Agradese ba lider politika sira hotu nomos ba populasaun Munisipiu Aileu tomak, tanba maduru tebes iha tinan politika, ida nee mak demokrasia”, tenik nia.

Nia katak, durante kampanha laiha kazu violensia ruma nomos iha eleisaun laiha mos fraude eleitoral.

Tuir nia, iha Munisipiu Aileu rasik iha sentru votasaun 95, no kontajen votus iha apuramentu finaliza ona iha 10 oras nee, no subemete tiha ona ba nasional, konaba dadus nia seidauk simu husi STAE, tanba nee karik bele konfirma ho STAE hodi hatene dadus loos no kompletu.

(gui)

LEAVE A REPLY

Please enter your comment!
Please enter your name here