Coliati Rekonese Membru F-FDTL Iha Fronteira Sei Menus

Xefe Estadu Maior Falintil-Forsa Defeza Timor Leste (F-FDTL), Coronel Calisto Santo “Coliati”, rekonese movimentu ilegal buras, tanba menus membru seguransa kolokadu iha area fronteira. (Foto: STL/Claudios de Jesus)

DILI, STLNEWS.co — Xefe Estadu Maior Falintil-Forsa Defeza Timor Leste (F-FDTL), Coronel Calisto Santo “Coliati”, rekonese movimentu ilegal buras, tanba menus membru seguransa kolokadu iha area fronteira.

“Fizikamente, forsa armadas hamutuk ho Polisia sira nee bele dehan seidauk sufisiente tanba ita hatene katak lina fronteira Timor Leste, iha lina ida neebe mak luan,” deklara Coronel Coliati, ba jornalista sira iha Kuartel jeral Fatuhada, Tersa (23/02).

Coronel nee dehan, Timor Leste iha nia area fronteira ida neebe mak luan tebes, tanba nee ho numeru rekursu neebe sei naton seidauk bele kobre ho sufisiente.

“Hahu hosi mota ain too mota masin nee area ida neebe mak luan tebes, entaun prezensa membru F-FDTL sira nee bele dehan, prezensa ida neebe mak minimu,” dehan nia.

Nia hatete, razaun komandu menus rekursu tanba komesa hosi 2015-2021 laiha rekrutamentu ba membru foun. Tanba ne’e mak forsa la too atu koloka iha teritoriu fronteria Timor laran tomak.

Enkuantu, nia afirma ba numeru sira neebe mak koloka iha Sentru Integradu Jestaun Krize ba kompoiu estadu maior nian koloka militar hamutuk nain 20.

No iha fronteira komesa hosi Manduki, Motaian, Batugade ba too iha Mota Masin, nee militar hamutuk nain 160, inklui mos hosi Oecusse no Atauru ba too Same Betanu hamutuk nain 210.

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here