Covalima Infrenta Uza Ambulansia

Foto: STL/Guilhermina Franco

DILI, STLNEWS.co – Munisipiu Covalima infrenta uza ambulansia ida hodi tula troka malu pasiente covid-19 ho moras bain-bain, tanba ambulansia 2 neebe ministeiru saude koloka ba Covalima too agora sei iha Dili.

Tuir Deputadu Bankada Fretilin, Alexandrino Cardoso, hatete horkalan simu telefone husi pesoal saude iha munisipiu Covalima katak, jatah ambulansia neebe sira hetan iha 2 maibe too agora sei iha Dili labele lori ba, tanba ema laiha korajen atu lori ba tanba moras Covid-19.

“Entaun Munisipiu Covalima uza deit ambulansia neebe maka iha, lori tula pasiente sira covid-19 depois tempu seluk uza fali hodi tula pasiente sira neebe moras bain-bain. Hau hanoin ida nee perigu tebes atu bele hadaet liu tan moras covid-9 nee, ba ita nia sidadaun sira seluk iha munisipiu refere,” dehan nia liu husi plenaria iha PN, Tersa (02/03/2021).

Nia informa, sujestaun husi maluk sira iha Covalima katak, Ministeiru Saude buka meus oinsa atu lori ambulansia 2 nee ba, maske la too iha Munisipiu Covalmia, lori ba too iha parte balu depois maka maluk sira husi Covalima mai foti ka intrega ba malu iha dalan deit.

Iha fatin hanesan, Sekretariu Estadu ba Komunikasaun Sosial, MericioJuvinal dos Reis “Akara”, hatete informasaun ho preokupasaun sira neebe liga ho covid-19.

“Hau sei transmiti ba ministeiru relevante, i resposta bele imidiate ou bele mai pur eskrita. Ba preokupasaun sira nee, ami konsidera hotu i Governu follow up,” hakotu nia.*

Reportajen: Domingas Soares/ Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here