Covid-19 Lahalakon Sarani Nia Fiar Ba Maromak

Padre Richardo Pasang, SVD. (Foto: STL/Emerenciana Pinto)

DILI, STLNEWS.co – Maske komemora Festa Natal tinan ida nee iha situasaun Covid-19 nia laran, maibe lahalakon sarani sira nia fiar ba maromak.

Kestaun nee hatoo husi Padre Richardo Pasang, SVD ba STL liu husi telefone Kinta (24/12/2020), hatete maske mundu tomak oras nee hasoru Covid-19 maibe keta tauk fiar nafatin ba maromak, hanesan Nain nia liafuan dehan, “Keta tauk, basa hau lori lia foun ida mai imi, lia nee sei haksolok imi hotu-hotu, iha David nia sidade, moris ona ba imi, Maksoin ida nia mak Messias katak NA’I”.

Padre hatutan tinan ida nee, sarani Kristaun sira hotu selebra Festa Natal iha situasaun pandemia Covid-19 neebe daet ba mundo tomak inklui mos iha Timor Leste.

Virus ida nee destroi a juntas da vida, virus ida nee halo ema tauk tamba ema barak lakon sira nia moris, familia barak triste tamba lakon ema neebe sira hadomi no mos lakon servisu lubuk ida, labarik lakon oportunidade no mos amizade ho nia kolega sira tamba sira tenke estuda iha uma, sarani barak la halo selebrasaun iha festa boot igreja nian tamba virus ida nee.

“Maske situasaun ida nee sei lao ba nafatin maibe selebrasaun Jesus nia moris mos mai nafatin hodi hatudu ba ita sarani sira, ba fiar nain sira katak Pandemia Covid-19 la halakon ita nia fiar ba planu salvasaun Maromak nian neebe inkarnado iha Jesus Kristu nia moris, nee duni, Maromak liu husi Anjo Gabriel haklaken ba ita fiar nain sira, “Keta tauk, basa hau lori liafoun ida mai imi, Lia nee sei haksolok imi hotu-hotu, Iha David nia sidade moris ona ba imi Maksoin nia mak Messias katak NAI” hatete Padre.

Padre nee hatutan iha inspirasaun Natal Kristu nian iha Pandemia Covid-19, Nai hakarak atu hametin sarani nia vontade diak hodi avansa ba transformasaun moris Kristaun no sai Kristaun kualidade no produtivu iha aspeto moris nuudar humana.

“Nee duni, espirito Natal Kristu nian, halo ita brani atu hateke ba oin, ba tinan foun hodi aranja stratejia moris hodi hasoru dezafios no difilkudade sira iha tinan oin mai. Tamba moris iha pandemia Covid-19 no mos moris iha era milenial, kompetisaun moris makaas tebes. Tan nee, melhora a kualidade no produtividade importante tebes ba ita Kristaun sira, inklui mos juventude milenial.” katak Padre Richardo.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here