Covid Influensia ACCCTO Laselebra Ano Novu

Foto: ACCCTO

DILI, STLNEWS.co – Tanba pandemia surtu Covid-19, halo Asosiasaun Comersial de Comunidade Chineza Timor Oan (ACCCTO), la selebrasaun eventu importante ka Ano Novu Chineza (Chinese New Year 2572) neebe monu iha loron 12 Fevereiru.

Kestaun nee fo sai husi Prezidente Asosiasaun Comersial de Comunidade Chineza Timor Oan, Kathleen Goncalves ba STL, Domingo (14/02/2021) via Messenger.

”Tinan ida nee, ami Asosiasaun Comersial de Comunidade Chineza Timor Oan (ACCCTO), laiha atividade selebrasaun ano novu Chineza, tanba hare ba Covid-19 agora dadaun iha TL, numeru kontinua aumenta tan, nee risku boot ba ita atu halibur malu, tanba nee maka ami deside katak tinan ida nee ACCCTO laiha selebrasaun,” dehan komunidade Chineza, Kathleen Goncalves.

Nia mos afirma liu tan katak, maske ACCCTO la selebra loron importante nee hamutuk, maibe fiar katak komunidade Chineza sira ida-idak bele selebra hamutuk ho sira nia familia iha ida-idak nia uma no fiar katak tinan foun sei lori felisidade, prosperidade no susesu ba asosiasaun ACCCTO.

”Hau nia votus ba familia neebe selebra shio tahun baru China, ka tinan karau nian, tuir kalendariu monu iha loron 12 fulan fevereiru 2021, maske ita la selebra hamutuk, tanba moras mundial neebe mundu hasoru hela, inklui TL, maibe fiar katak nafatin haberan vertude karau nian ka shio kerbau,” dehan komunidade Chineza nee.*

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here