DILI, STLNEWS.co – Partidu politiku hotu hahu promete ba povu Timor Leste (TL), atu dada kadoras mai nee diak, tanba nee povu hein asaun laos promete.
“Hau hanoin kompromisu politiku sira nee diak, maibe oinsa atu maximiza benefisiu ba povu TL, minimiza risku no kustu hodi maximiza benefisiu, infelizmente laiha esforsu ba estudu, maibe sira hotu uza asuntu nee ba buka poder deit, duke halo estudu neebe diak liu dezenvolve setor neebe produtivu no sustentavel hodi lori Timor ba futuru naruk,” kestaun nee fo sai husi Koordenador Lao Hamutuk, Celestino Gusmao Pereira ba STL, Domingu nee (30/04/2023) liu husi telefone.
Nia katak, petroliu no gas konhesidu ho risku aas, kustu aas, skil aas i ema oituan deit mak servisu iha neeba.
Iha parte seluk, Prezidente Partidu CNRT, Kay Rala Xanana Gusmao mos promete ba povu katak, karik CNRT kaer ukun iha eleisaun mai, mak CNRT sei luta hodi dada kadoras mai TL, ho nunee bele kria kampu sersivu ba Timor oan sira, no sei hadia futuru nasaun ida nee nian.
Aleinde nee, Prezidente Partidu PD, Mariano Asanami mos promete katak, PD kaer ukun iha tinan 2023 mak sei dada kadoras mai TL.
(mad)
