DILI– Depois Asina Fronteira Maritima (FM), sei halao iha loron 6 fulan Marco, presiza Parlamentu Nasional (PN) liu husi Komisaun Permanente (KP) halo kedas ratifikasaun, atu nunee fo presaun ba parlamentu Australia mos bele ratifika.
Kestaun nee hatoo husi Xefe Bankada CNRT Arao Noe hatete, kona ba ratifikasaun husi PN, oras nee dadaun PN disolve iha KP bele ratifika kalae, tuir Arao, iha artigu 102 konstituisaun hatete katak KP bele komvoka plenaria extraordinariu atu hodi ratifika ba asuntu interese nasional ou ba asuntu estadu.
Ida nee mos kabe ba Prezidente PN, atu haree ida nee asuntu estadu kalae. Hau husu FM asina iha dia 6 de Marco, PN tenke halo kedas plenaria extraordinaria ratifika FM, hodi fo presaun ba Ausralia, atu sira nia parlamentu mos bele ratifika. Tanba ida nee impaktu boot tebes ba interese nasional no ita nia soberanu bele hela klaru ho FM,” katak Arao ba Jornalista iha bankada CNRT, PN, Kuarta, (28/02/2018).
Xefe bankada nee mos hatoo parabens ba maun boot Xanana ba negosiasaun FM neebe susesu ona, hein para atu bele asina iha dia 6 iha Nova-Worke. Ida nee luta ida TL atinji tan depois independensia, neebe atu asina FM nee katak rikusoin Bayun Undan nee TL nian tomak.
Nunee mos Deputadu husi Bankada Fretilin/ Antoninho Bianco hatete, FM kuandu akordu nee asina entre Timor Leste ho Australia sei lori mai iha Konsellu Ministru ratifika uluk, depois haruka fali ba iha PN atu ratifika nee tuir regras.
Maibe kestaun agora nee sei prosesu hela asina bainhira mak akontese, depois seidauk tan bainhira mak atu ratifika iha KM, depois lori mai iha PN. Notisia kompletu lee iha jornal edisaun Kinta, (01/03/2018). Guilhermina Franco