Deputadu PD-CNRT Seidauk Prienxe Rekezitu Hili Komisariu KAK

DILI, STLNEWS.co – Oras nee daudaun Partidu CNRT no PD mak posivel lidera IX Governu, maibe votus deputadu iha Parlamentu Nasional la prienxe korum ou 2/2 dois tersu atu hili Komisariu Komisaun Anti Korupsaun (KAK).

Kestaun nee hatoo husi Diretor Ezekutivu Hak, Feliciano da Costa Araujo ba jornalista iha nia knaar fatin Farol, Kuarta (31/05/2023).

“Se koalia konaba hili Komisariu KAK, presiza prienxe korum ou dois tarsus 2/2 maizumenus ita koalia karik reprezentante povu iha uma fukun parlamentu nee nain 43 tenki fo votus, agora sira rasik neebe halo koligasaun sira foin mak 37, husi PD kadeira 6 no CNRT iha 31, seidauk too ba iha neeba, ita espera katak sira lidera governu nee rasik iha ona estratejia no mekanizmu oinsa mak halo lobi ba iha PLP, KHUNTO, FRETILIN,” katak Diretor HAK.

Diretor HAK hatete, garante ka lae sira nia governasaun ba oin nee depende ba partidu rua nia komunikasaun, serake hatudu deit sira nain rua too deit asina nee ka ou lori malu hahu insiu too remata.

“Sosiedade nee hatene ona CNRT perna husik ona PD, iha dalan klaran 2015, depois FRETILIN hodi mai konsensus hodi fo votus hodi governu nee bele lao ba oin, final buat sira nee bele akontese, sosiedade sivil nia haree politika ida nee atu husu karik dehan politika ida ideal mak ida neebe, serake dehan manan halo koligasaun depois ba kaer ukun deit ida nee mak ideal ou oinsa mak koalia konaba unidade nasional,” katak nia.

Nia hatutan, partidu rua neebe mak agora kaer ukun presiza tetu didiak, bele involve partidu neebe mak sira fihir hanesan potensia hodi akompanha mos prosesu ba rai ida nee.

Nunee mos Diretor Ajar Jose Luis Olivera hatutan, konaba governu eskolha Komisariu KAK no parlamentu aprova, maibe atu hili Komisariu KAK mos presiza liu korum, maibe deputadu iha PN la liu, diak liu halakon deit komisariu.

“Hau lakohi fo komentariu konaba KAK, hau nia posizaun diak liu KAK nee bobar deit diak liu, ita reforsa instituisaun Ministeriu Publiku, tanba KAK nee halo deit birokrasi ba prosesu kombate korupsaun, tuir lo-loos buat sira nee ita haforsa deit iha Ministeriu Publiku para nia rekursu neebe mak iha ita haforsa deit, diresaun iha Misteriu Publiku para fokus ba kombate korupsaun lalika biokrasia,” katak nia.

Nia hatutan, rai ida kiik nee la presiza investe institusaun oin-oin neebe fo pezu ba orsamentu jeral estadu, ida nee buat ida nebee presiza konsidera, tanba nee nia sujere KAK nee halo lakon deit, no rekursu ida KAK koloka fali ba Ministeriu Publiku hodi hametin devizaun neebe mak iha responsabilidade ba kombate korupsaun, nunee efisiensia liu.

(eme)

LEAVE A REPLY

Please enter your comment!
Please enter your name here