DILI, STLNEWS.co – Relasiona ho informasaun balu neebe espalha, deskonfia pasaporte lakon, ekipa Komisaun Anti Korupsaun (KAK) halibur hela informasaun.
Tuir Direktor Investigasaun KAK, Jose Verdial katak, konaba informasaun neebe dehan deskonfia pasaporte lakon, ekipa unidade ida husi KAK halibur hela informasaun.
“KAK iha Unidade ida naran Unidade Informasaun no Seguransa, agora unidade nee mak halao hela servisu hodi halibur informasaun,” dehan Jose ba STL iha Dili, Domingu nee (19/03/2023).
Nia hatutan, ekipa nee oras nee daudaun halibur hela informasaun, depois mak haree fali nia prosesu ba oin.
Hatan konaba mina neebe lanu ema, Jose dehan konaba mina nee laos KAK nia kompetensia atu haree ida nee, tanba KAK nia kompetensia mak halao Prevensaun no Investigasaun Kriminal ba deit Krimi korupsaun.
Antes nee, Diretor Rejistu Notariadu, Joao Fernando Martins Borges dehan, pasaporte la lakon ida, se dehan pasaporte lakon, iha investigasaun ruma nia parte mos prontu koopera.
Hanesan diretor jeral hakarak informa katak, dezde lansamentu pasaporte eletroniku iha loron 5 Maiu 2017, iha momentu neeba lansa pasaporte eletroniku, kontratu ho kompanhia sira no inisiu iha kaderneta 150 mil kaderneta, se 150 mil nee lakon hotu nee imposivel, nee lalos,” dehan diretor nee.
Nia sublinha, hahu husi inisiu kompanhia fornese 14 mil kaderneta iha 6 Marsu 2017 ba iha faze primeiru, no segundu faze iha Agostu 2017 hatama tan 63 mil kaderneta, iha 2018 kompleta tan 73 mil kaderneta hodi kompleta 150 mil kaderneta.
(ter)
