Deskute Malu Poder Atitude Ladiak

Koordenador Forum da Pas, Alves Martins Santos. (Foto: STL/Emerenciana Pinto)

DILI, STLNEWS.co – Reprezentante povu iha uma fukun Parlamentu Nasional neebe mak deskute malu ka hirus malu tan poder, ida nee hatudu atitude neebe ladiak ba povu sira.

Kestaun nee hatoo husi Koordenador Forum da Pas, Alves Martins Santos ba STL liu husi telefone, Kuarta (10/03/2021).

Nia hatete, deputadu sira neebe mak istori malu tanba poder, ida nee hatudu atitude neebe mak ladiak.

“Horseik deputadu sira istoria malu tanba poder, nee koalia momos deit katak, hatudu atitude neebe ladiak, tanba povu hotu hatene momos Uma Fukun Parlamentu Nasional nee reprezenta povu. Ba nee tau prioridade povu nia, koalia ho ulun mamar tau profesionalismu no hanoin neebe mak konstrutivu atu debate konaba povu nia moris, serake ba deskute malu fali buat seluk ida nee koalia momos katak hatudu etika lideransa laiha, no hamihis etika de komunikasaun,” dehan nia.

Alves husu reprezentante povu iha Uma Fukun Parlamentu Nasional, koko tau hanoin hamutuk oinsa atu deskute prioridade ba povu nia moris. Labele tau deit partidu mak sai prioridade hodi halo auto defeza no defeza ba partidu ida nee lalos. Reprezenta povu iha uma fukun tuir koalia no simu malu, ho buat diak tanba povu hein hela domin ajuda no tulun.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here