Dezentendimentu Bankada Governu; CNRT Preokupa, Governu “Ameasadu”

Vise Bankada CNRT, Patrocino Fernandes. (Dok: STL)

DILI, STLNEWS.co — Dezentendimentu entre bankada governu (PLP-Fretilin) ba asuntu fahe poder neebe lahanesan, sai preokupasaun ba bankada CNRT. Tanba governu da-8 neebe viabiliza husi FRETILIN hamutuk ho PLP no Khunto “ameasadu”.

Kestaun nee hatoo husi Vise Bankada CNRT, Patrocino Fernandes ba jornalista Kinta semana kotuk.

“Iha partidu tolu neebe mak oras nee dadaun mosu dezentendimentu, ita lalikan halo senariu, maibe nee haree rasik katak sira nia kemesraan menus, maibe ita hein katak sira bele asegura sira nia mandatu too hotu i tenke lori Timor ba oin,” dehan Patrocino.

Nia hatutan governu ida nee atu lao too remata ka lae depende ba partidu neebe hamutuk, maibe haree ba sira nia diferensa ideias ba fahe poder lahanesan nee bele dehan katak ladura.

Patrocino konsidera partidu 3 neebe viabiliza governu laiha konsertasaun politika ba interese nasaun no povu, maibe partidu tolu nee enkontru lori sira hamutuk ba konsentrasaun poder, bainhira poder fahe lahanesan, balu sente prezudikadu, balu sente previlezu liu nee mak sai ameasa ho sasan sira nee hotu.

“Maibe nafatin hau hanoin katak nee hanesan faze aprendizajen ba ema hotu foin tama iha ukun. Partidu 3 nee kritika hikas malu nee hau hanoin nee kestaun politiku liu ona, maibe depende ba forsa politiku 3 neebe iha nia maturidade politiku atu hodi haree interese povu no interese nasaun no mos interese partidu nian,” komenta Patrocino.

Maturidade ho sira nia esperensia politika neebe iha tuir vise Prezidente bankada CNRT nee bele halo jestaun ba diferensa ideias iha, katak bele, maibe se labele nee pasensia.

Governu nee atu dura ka lae, atu dehan katak governu nee tuir lei laeziste, se sei eziste nee tanba maioria uza PN bele halo manobra ba buat hotu.

Iha Sorin seluk Xefe Bankada FRETILIN Francisco Branco antes nee hatete, haree sira bankada 3 iha governu neebe kritika malu ba rekrutamentu prezidente autoridade munisipiu sira, maibe sira sei lamosu dezentendimentu, tanba rekrutamentu nee liu husi konkorsu publiku, i sira halo ida nee atu muda sistema tuir politika governu da-8 nian. Tanba nee garante sei lamosu dezentendimentu entre sira bankada governu.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here