DILI, STLNEWS.co – Problema neebe oras nee daudaun nasaun hasoru mak TL seidauk iha sertifikadu orijinal atu halo esportasaun produtu lokal ba rai liur, maski potensial boot ba produsaun, maibe dilema, tanba laiha sertifikadu orijinal.
“Balansu ba sasan impor no espor la hanesan, tanba nee importa numeru aas liu duke TL halo espor, problema tanba ita seidauk iha sertifikadu orijinal atu esporta produtu rai laran ba rai liur, maski potensial ba produtu barak, tan nee dilema boot ba ita atu halo esportasaun, tanba ita laiha sertifikadu orijinal atu halo espor,” kestaun nee fo sai husi Visi Ministru Komersiu, Augusto Junior Trindade iha nia knaar fatin, Kinta (03/08/2023).
Nia afirma, agora governu liu husi ministeriu ida nee halo hela esforsu, oinsa produtu neebe TL iha bele halo esportasaun ba rai liur, se lae mak kontetor sira neebe tula sasan mai husi rai liur fila ho laran mamuk, la tula netik produtu ruma iha laran hodi lori ba faan iha ema nia rai.
Tuir nia governu sei kria kondisaun, liu-liu estabelese sentru laboratóriu ida iha Tibar, hodi estabelese makina sertifikasaun nian, tan nee buat hotu sei lao tuir nia tempu mai, fiar katak tempu badak buat hotu bele lao diak, i TL bele halo esportasaun produtu lokal ba rai liur, hanesan mina nuu virjen, ninur no produtu sira seluk neebe merkadu rai liur husu hela.
(mad)
