DILI, STLNEWS.co – Relasiona ho nomeasaun Longuinhos Monteiro ba iha kargu Diretor Jeral Servisu Nasional Intelijensia, hamosu preokupasaun iha sosiedade nia leet, tanba konsidera laiha tan ema seluk ona, no tanba sa tenki Longuinhos Monteiro.
Tuir Jurista Julio Crispin katak, nomeasaun nee kompetensia Primeiru Ministru nian. Primeiru Ministru hakarak atu hili se se, atu nomeia se se iha nee kompetensia Primeiru Ministru nian. Maibe ida neebe preokupa nee maka Longuinhos iha hela kazu ligadu ba kilat iha hela prosesu investigasaun, nia prejunsaun maka ida nee, liga ba prezunsaun de inusensia prosesu investigasaun lao hela.
“Ema neebe mak ba PM nia matan kompetente, no ema neebe iha liu kapasidade atu diriji SNI mak Longuinhos Monteiro deit ona, PM mak tetu, sei se iha tan ema seluk ida neebe diak liu Longuinhos Monteiro sei iha, nusa maka la hili ema seluk, ou ema seluk neebe hanesan ho Longuinhos Monteiro sei iha nusa la hili ema seluk tenke ser Longuinhos Monteiro, ida nee maka ita kestiona nee,” dehan Jurista Julio Crispin ba STL iha Bebonuk, Segunda nee (04/09/2023).
Tuir Jurista nee, ema neebe livre husi kazu nee laiha ona, balu neebe iha nia aptidaun hanesan Longuinhos Monteiro laiha ona ka, se sei iha nusa la hili ema seluk, tanba sa tenki Longuinhos Monteiro.
Nunee, tuir Julio juridikamente kompetensia atu nomeia nee Governu nian, maibe Governu mak tenki hatene atu hili ema neebe iha duni kapasidade atu halao servisu iha SNI. Se la iha tan ona ema seluk iha Timor nee se iha deit Longuinhos Monteiro, nee atu dehan hanusa.
Iha fatin ketak, Jurista Alexandre Corte Real dehan, nomeasaun ba Longuinhos Monteiro nee nomeasaun politiku.
“Nomeasaun nee kestaun politika, Primeiru Ministru simu konfiansa nomeia Longuinhos Monteiro sai nudar Diretor SNI laiha problema ida, la tak dalan ba justisa atu halao nia justisa,” dehan nia.
Nia hatutan, uluk nia iha kazu konaba kilat, kazu nee nia grau gravidade prosesu nee kluer tebes. Tanba nee kuandu Governu presija sidadaun ida atu kolabora iha area sira nee, nudar sidadaun iha dever atu hakarak hodi aseita saida maka estadu presija, konaba prosesu neebe iha hela, la impede justisa hodi lao nafatin.
Tuir Jurista nee, respeita mos desizaun nomeasaun husi PM ba Longuinhos Monteiro, em termus de politiku ida nee normal, iha Justisa nian prosesu lao hela seidauk hatene nia sala ka loos, nomesaun nee la impede katak Justisa hakarak lao kontinua. Tanba Justisa lao independente labele kahur buat rua. No agora mos labele kondena lai nia sala, tanba Justisa seidauk hotu, tanba nee aseita ho nomeasaun nee la viola Justisa, no nomeasaun nee simu responsabilidade boot konaba asuntu intelijen.
Aleinde nee, Jurista Avelinho Colho afirma, nomeasaun nee kompetensia prerogative Primeiru Ministru nian.
“Nomeasaun Longuinhos ba kargu nee, kompetensia Prerogativas Primeiru Ministru nia konfiansa no planu, no Longuinhos Monteiro iha duni kompetensia no kapasidade ba area neebe nomeia ba,” dehan nia.
Nia hatutan, konaba sosiedade sira preokupa prosesu neebe iha hela Primeiru Ministru, nia hatan tuir ita nia lei ema kuandu seidauk julgadu, seidauk kondenadu nia seidauk sala, ita nia lei prezunsaun de inusensia.
(ter)
