DILI, STLNEWS.co – Ministru Koordenador Asuntu Ekonomia (MKAE) Joaquim Amaral hateten, lansamentu distribuisaun sesta bazika sei hahu iha fulan Abril tinan nee.
“Hau hanoin Konaba programa sesta bazika daudaun nee ita iha ona faze lansamentu, lei diploma hatete, apartir loron 11 fulan Abril ba oin bele hahu ona lansamentu. Tanba nee mak espasu hahu nakloke, Ministeriu Implementador prepara sira nia aan hahu prosesu lansamentu, no hau fiar katak iha fulan Abril nia laran lansamentu distribuisaun sesta bazika sei hahu,” dehan MKAE, Joaquim Amaral ba jornalista sira iha edifisiu Ministeriu Finansas, Aitarak Laran, Dili, Tersa nee (12/04/2022).
Governante nee dehan, total kompania neebe sei partisipa iha distribuisaun sesta bazika dala ruma liu 200.
“Hau fiar kompania sira neebe sei partisipa iha distribui sesta bazika ba komunidade sira nee sei liu 200 resin, tanba iha faze primeiru deit 286 hanesan nee,” dehan nia.
Total orsamentu neebe governu preve ona ba programa sesta bazika nee hamutuk tokon US$ 80, entre orsamentu nee tokon US$ 40 sei jere husi Ministru Turizmu Komersiu Industria, no tokon US$ 40 sei jere husi Sekretariu Estadu Kooperativa (SEKOOP).
(alb)
