DILI, STLNEWS.co – Hanoin hikas loron 30 de Agosto 1999 loron Konsulta Popular nian, primeiru agradese ba Maromak ba diak tomak neebe Nai Maromak fo liu husi eventu boot nee, bele hetan liberdade.
Lia fuan murak nee hatoo husi Sua Eminencia Dom Virgilio Cardeal do Carmo da Silva, SDB ba STL iha Katedral, Dili, horiseik (27/08/2023).
Dom Virgilio hatete, primeiru parabens ba povu Timor neebe ema hotu hatene katak, ho eventu konsulta popular mak determina futuru rai ida nee nian, neebe ohin ema goja daudaun ninia independensia, katak loron konsulta popular fo hanoin ba ukun rasik aan, liberdade nee ema hotu ninia kontribuisaun, ema hotu nia sakrifisiu, ohin goja no hetan liberdade.
“Hanoin fali istoria konsulta popular ida nee, primeiru iha sentidu agradesimentu ba Maromak, ba povu hotu-hotu, tau nafatin iha momentu nee hanoin Nai Maromak, agradese ba Maromak ba diak hotu neebe Maromak fo mai liu husi loron konsulta popular ida nee, atu nunee bele goja ita nia liberdade,” dehan Dom Virgilio.
Bibi Atan Uma Kreda haktuir, iha momentu konsulta popular nee mos iha momentu diak ida fo hanoin fali ba povu tomak atu hanoin katak nasaun nia futuru, nasaun nia prosperiedade, nasaun nia diak depende mos ba povu hotu-hotu kiik , boot, matenek, beik ema hotu hamutuk liberta ukun aan ida nee nee, tanba nee ema hotu iha obrigasaun nee iha dever ida nee, atu konstrui atu harii nasaun TL, hola konsiensia responsabilidade kada Timor oan, kiik, boot, katuas, ferik ema hotu iha responsabilidade.
Dom Virgilio informa, nuudar labariik oinsa atu halao nia knaar no dever nudar oan, estudantes nudar joven oinsa hatene promove pas, kria estabilidade ida nee mak kontriuisaun ida neebe labarik, foinsae, adolsente ema hotu kontribui iha idak-idak nia dalan.
(joa)
