Dom Virgilio: Tempu Kuaresma Pontu 3 Importante

Arcebispo Arquidiocese Dili, Dom. Virgilio do Carmo da Silva, SDB hatete, tempu kuaresma pontu 3 maka importante hanesan halo orasaun, hadia relasaun ho maluk sira no sakrifisiu ho jejun. (Foto: STL/Blandina Mauno)

DILI, STLNEWS co – Arcebispo Arquidiocese Dili, Dom. Virgilio do Carmo da Silva, SDB hatete, tempu kuaresma pontu 3 maka importante hanesan halo orasaun, hadia relasaun ho maluk sira no sakrifisiu ho jejun.

Dom. Virgilio haktuir, nuudar sarani tama iha tempu foun no kuaresma husi naran nee rasik dehan loron 40, husi loron 40 nee, konvite ida ba sarani hotu, atu aproveita loron 40 nee nuudar dalan preparasaun ba loron paskua ninian.

“Tan nee momentu konvite ida ba sarani sira, iha loron 40 nia laran nee, uma kreda mos tau toman sira neebe ita hotu hatene tiha ona, neebe sempre fo hanoin mai ita katak, iha loron tempu kuaresma ninian atu sarani sira primeiru halo orasaun, tempu loron 40 hanesan ita nain Jesus Kristu, ita mos aprende fo tempu atu halo orasaun ka fo biban tempu ba orasaun, tanba durante tempu barak ita lakon ba servisu no preokupa maibe iha espesial ida nee uma kreda fo liu tempu ba orasaun, hafoun hadia fali ita nia relasaun ho nain maromak,” dehan Dom.Virgilio ba jornalista sira, hafoin remata misa Kuarta Feira Cinzas, iha Igreja Katedral, Dili, Kuarta (17/02/2021).

Bibi atan Igreja Katolika nee esplika, segundu tempu mos atu hadia relasaun ho maluk sira, halo karidade katak, oinsa koko mos atu fahe ba maluk sira neebe fraku liu, kiak liu laiha posibilidade hanesan ho ema seluk, oinsa aprende sai laran luak ho sira, aprende laos atu ho maromak deit, maibe ho maluk sira liu-liu koalia konaba esmola lolo liman ba malu.

Terseiru iha tempu kuaresma nia momentu ida mos sarani halo sakrifisiu ho jejun, jejun katak durante tempu kuaresma nee lubuk ida neebe ita koko atu husik liu-liu iha loron Kuarta Feira Cinzas no Sesta Feira.

Pur ezemplu iha Kuarta Feira Cinzas, Sesta Feira Santa ka loron Sesta Feira ninian nee atu halo jejun no abstenensia, jejun katak buka atu han naton, abstenensia katak oinsa atu absten, husu ita nia kaan sira gosta iha loron hirak nee, atu lahan naan buat sira neebe hetan fo ksolok nian.

Arcebispo afirma jejun abstenensia mai ita hodi jejun abstenensia dala ida ba atu aprende mos terus oituan, maka lori hodi bele kuinese ema nia frakeza, fasilidade ema nia sala hodi husu perdaun ba nai maromak, entaun ida nee mak dalan ba kuaresma nian.

“Hau dehan oportunidade ida dala ida iha tinan ida neebe uma kreda fo nafatin ba mai ita sarani hotu-hotu, atu aproveita hanesan ohin ita rona iha segunda leitura momentu grasa nian, momentu neebe diak, tempu grasa nian, ita tenke aproveita duni atu bele hadia lao iha dalan neebe los,” Arcebispo haktuir.*

Reportajen: Blandina Mauno/Joaninha Belo
Editora: Carme Ximenes

LEAVE A REPLY

Please enter your comment!
Please enter your name here