DILI, STLNEWS.co – Liu husi omilia Amu Parku Igreja Maria Auxiliadora, Apolinario Maria Ornai, SDB afirma, ohin Domingu Ramus, nudar sarani atu ema idak-idak afirma ninia fidelidade no ninia identidade nudar Maromak ninia ilas.
Bibi atan nee dehan, nudar sarani atu prepara aan hodi selebra misteriu paskal neebe kredo oferese mai atu sai sentru moris sarani no moris Maromak ninia oan neebe mak diak iha mundu rai klaran.
Bibi atan nee dehan, selebrasaun Domingu Ramus fo hanoin mai sarani sira liu-liu misteriu salvasaun nian, valores fiar i valores neebe Nai Maromak hakarak ba ema hotu, neebe halao nia viajen iha mundu ida nee atu diskobre, no hakas aan atu pratika ıha moris loron-loron nian.
“Tanba nee, ohin Domingu Ramus ita fo bensa ba ramus nudar sarani ema idak-idak atu afirma ninia fidelidade no afirma identidade nudar Maromak ninia ilas, nudar Maromak ninia oan i nudar sarani katolika,” dehan bibi atan nee liu husi nia omilia iha İgreja Maria Auxiliadora, Komoro, Domingu nee (02/04/2023).
Bibi atan nee katak, ho esperansa no hanoin neebe luan katak, la mesak maibe Nai Maromak lao hamutuk ho ema hotu iha dalan oin-oin, iha meus oin-oin nomos iha maneira oin-oin.
Entaun liu husi prosesaun Jesus sae kuda buru ida hatudu simplisidade, hatudu haraik aan i hatudu laran mos hodi pratika halo tuir Aman ninia haruka no Aman ninia hakarak.
“Tanba nee, Jesus dignifika ita idak-idak nia moris, nudar ema atu eleva ita idak-idak ninian moris nee sai nudar Maromak ninia ema atu lori tama iha fatin santu Jerusalem, hodi selebra misteriu paskal atu hanoin lo-loos memoria neebe Jesus halo ikus hodi hatudu ninia domin lo-loos neebe mate iha kruz,” tenik nia.
Bibi atan nee sublinha, Jesus nia domin lo-loos mak iha sakramentu sira, nia domin lo-loos mak iha ekaristia, tan nee Jesus mate iha kruz hodi hatudu lo-loos domin Aman Maromak nian domin ida neebe la ho kondisaun, domin salvasaun nian i domin ida nee ba too ema hotu-hotu, tanba Aman Maromak hakarak atu soi ninia povu.
(dom)
