Dosente 5 Lamenta, Adolmando Hapara Servisu

Reitor UNPAZ, Adolmando Soares Amaral. (Foto: STL/Blandina Mauno)

DILI, STLNEWS.co – Dosente nain lima lamenta tebes ho Reitor Universidade da Paz Adolmando Soares Amaral, neebe hapara sira nia servisu durante hahu husi 2020 too 2023.

Lamentasaun nee hatoo husi Porta Voz, Dosente Amilcar Araujo dos Reis, liu husi Komferensia Imprensa, neebe halao iha Farol, Dili, Segunda (05/10/2020).

Nia dehan sira husi Universidade da Paz neebe Reitor Adolmando Soares Amaral hapara. Sira nain lima hanesan dosente ida ho staff administrasaun nain haat.

Dosente nain lima lamenta tebes ho Reitor Universidade da Paz Adolmando Soares Amaral, neebe hapara sira nia servisu durante hahu husi 2020 too 2023. (Foto: STL/Blandina Mauno)

“Ami lamenta no ami lasimu ho Reitor UNPAZ neebe mak fo pendente mai ami nain lima, durante nia mandatu hahu husi 2020 too 2023,” hatete Amilcar.

Nia hatutan, durante halao servisu iha UNPAZ sira nain lima lahalo sala no kolabora diak ho dekanu fakuldade, Unit ho Xefe Departamentu sira hotu iha Universidade refere.

“Ami nia dekanu fakuldade no Xefe unit ho Xefe departamentu sira nunka halo karta xamada mai ami, durante ami servisu tinan ualu ona, tanba lahalo kontra ruma iha UNPAZ, liuliu fakuldade no unit,” nia hatete.

Porta Voz nee esplika, mosu deit tendensia entre sira ho Reitor Adolmando Soares Amaral, tan deit iha midia sosial ka facebook Reitor hatun nia topiku iha neeba dehan katak, dosente sira halo modul lahatene, entaun nia latemi naran, maibe hanesan dosente UNPAZ lasimu, no sira rasik mos resposta tuir buat neebe Reitor hatun iha facebook dehan katak, sei dosente halo modul lahatene, hahu husi 2004 too 2020, cetak sarjana bar-barak nee Reitor hanoin oinsa.

Ho mosu komfrontasaun ida nee hotu maka Reitor rasik mos komesa responde mai dehan katak, UNPAZ nee Reitor Saudozu Lucas da Costa halo imajinalojia ka pencitraan durante lidera UNPAZ hodi hetan rekuinesementu neebe mak iha internasional.

Reitor rasik mos dehan, UNPAZ investe osan rihun neen pur anu ba internasional lori hetan premiu neebe maka dala haat UNPAZ simu ona.

Entaun nia mos dehan premiu sosa deit, sei nunee ijasah sira nee durante hahu 2004 too 2020 mos sosa deit.

“Iha dia 25 kalan ami koalia dadersan ba Reitor hapara, sei laiha karta xamada ruma husi fakuldade direitu, ikus mai hetan karta husi fakuldade dehan dosente sira kolabora ho ami hanorin diak hela, maibe Reitor hapara laiha baze legal ruma,” Porta Vov nee esplika.

Tanba nee nia dehan, sira sei lori karta ba hatoo iha KSTL no SEFOPE, atu klarifika lolos.

Entretantu hatan ba kestaun nee Reitor UNPAZ, Adolmando Soares Amaral hatete, informasaun lolos universidade fo sansaun disiplinar ba dosente ida ho funsionariu nain haat, tanba lakumpri sira nia dever. Laos hanesan espalla iha facebook katak, parte universidade hasai funsionariu.

“Nee informasaun la loos ou falsu,” hatete Adolmando. Nia hatutan parte universidade seidauk hasai ema ida ka funsionariu ruma husi fatin nee, so iha deit mak sansaun ba sira.

“Universidade seidauk hasai ema ida, iha ami nia mandatu sempre responde sira nia direitu ho diak. Bainhira ami fo hanoin sira lakoi koopera ho ami mak iha ultimu dia, ami fo sansaun disiplinar ba sira,” tenik nia.

Adolmando afirma parte universidade foti asaun refere bazeia ba estatutu universidade nian iha artigu 4 no 5 neebe fo dalan atu fo sansaun disiplinar funsinariu ou dosente sira. Husi sansaun refere parte universidade hapara provizoriu salariu ba funsionariu no dosente neebe lakumpre sira nia dever ho diak.*

Reportajen: Blandina Mauno/Joaninha Belo
Editora: Carme Ximenes

LEAVE A REPLY

Please enter your comment!
Please enter your name here