Durante Covid Atividade UNE-TL Bobonaro Kontinua Lao

Uniaun Nasional Escuteiros Timor Leste (UNE-TL), Agrupamentu Floresta Konsellu Munisipiu Bobonaro, kontinua halao nafatin atividade akampamentu ba membru sira, iha tempu moras Covid-19 nia laran. (Foto: Facebook)

DILI, STLNEWS.co – Uniaun Nasional Escuteiros Timor Leste (UNE-TL), Agrupamentu Floresta Konsellu Munisipiu Bobonaro, kontinua halao nafatin atividade akampamentu ba membru sira, iha tempu moras Covid-19 nia laran.

Diretor Ezekutivu Uniaun Nasional Escuteiros Timor Leste (UNE-TL), Julio Gomes hatete, UNE-TL agrupamentu floresta konsellu munisipiu Bobonaro sempre halao nafatin aktividade akampamentu ba membru sira, maske iha tempu moras covid nia laran. Maibe atividade neebe halao iha situasaun pandemia nee la hanesan ho tempu baibain ka antes Covid-19 nee mosu.

“Ami agradese ba maromak, tanba too ohin loron atividade akampamentu neebe ami halao durante Covid-19 nee mosu iha fulan hirak liu ba, seidauk iha ami nia membru ida mak hetan sintomas ba moras nee, tanba nee ami kontinua halao ami nia atividade akampamentu ba iha fat-fatin, maibe kumpri nafatin regras husi saude mundial nian mak hanesan halo kedas prevensaun hanesan uza maskra, no rega sanitaizer ba membru sira, wainhira hahu tama iha fatin akampamentu” Julio haktuir liafuan nee ba STL via telefone, Segunda (30/11/2020).

Nia hatutan, eskuta sempre alerta, prontu hasoru dezafiu iha situasaun saida deit hodi dezenvolve no promove foin sae Timor Leste. Tanba nee maske oras nee sei iha situasaun pandemia nia laran, maibe UNE-TL munisipiu Bobonaro nian, kontinua halao atividade akampamentu ba nia membru sira.*

Reportajen: Domingas Gomes
Editora: Carme Ximenes

LEAVE A REPLY

Please enter your comment!
Please enter your name here