KBRI Dili: Husu Sidadaun TL Viajen Ba Indonezia Liu Dalan Legal

DILI, STLNEWS.co – Atase Imigrasaun Embaixada Republika Indonezia (KBRI) Dili, Eben Rifqy Taufan Sitopu, husu ba sidadaun Timor Leste neebe hakarak viajen ba Indonezia tenke liu husi dalan legal, tanba liu husi dalan ilegal konsekuensia sei kona multa tokon atus ida (Rp 100.000.000) ou ameasa pena prizaun tinan ida tuir lei imigrasaun neebe vigora iha Indonezia.

Xefe Imigrasaun KBRI Dili, Eben Rifqy Taufan Sitopu hato’o lia hirak nee ba STL iha KBRI Dili, Sesta (03/09/2021), relasiona ho sidadaun TL tama teritoriu Indonezia liu husi dalan ilegal iha fulan Agostu nia laran ho numeru ema nain atus hitu lima (705).

“Governu Indonezia liu husi Ministeriu Justisa no Direitus Humanus sei fo tolera ba sidadaun Timor Leste nain atus hitu lima (705) neebe tama Atambua, Distritu Belu, Provinsia Nusa Tenggara Timur (NTT) liu husi dalan ilegal. Tuir lei imigrasaun nian sira kona multa tokon atus ida ou ameasa pena prizaun tinan ida. Tamba nee ami husu ba sidadaun Timor Leste neebe hakarak viajen ba Indonezia tenke liu husi dalan legal,” katak Eben.  

Tuir Xefe Imigrasaun KBRI Dili, Eben Rifqy, dadaun nee nia tuur hamutuk ona ho Vise Ministru Interior, Antonio Armindo no Diretur Jeral Imigrasaun Timor Leste, diskute konaba kazu Timoroan tama teritoriu Indonezia liu husi dalan ilegal. 

Husi diskusaun nee katak sidadaun Timor Leste neebe hakarak viajen ba Indonezia tenke liu husi dalan legal, no lori dokumentu viajen nian hanesan passaporte neebe sei validu. Maibe, tanba situasaun pandemia Covid-19, mak Governu Indonezia seidauk fo lisensa ba ema estranjeiru vizita ou tranzit ba Indonezia, inklui estudante Timor Leste neebe halao sira nia estudu iha Indonezia.

“Governu Indonezia seidauk fo lisensa ba ema estranjeiru viajen ba Indonezia ho razaun atu prevene no hakotu korenti haklekar Covid-19 inklui variante Delta. Maibe governu Indonezia fo autorizasaun ba sidadaun estranjeiru neebe hetan autorizasaun rezidensia limitada (Ijin Tinggal Terbatas – ITAS) no sira neebe hetan autorizasaun residensia permanente (Ijin Tinggal Tetap – ITAP), i sira neebe uza passaporte servisu no passaporte diplomatiku bele tama Indonezia, depois kumpre protokolu saude Covid-19 neebe rekomenda husi Ministeriu Saude,” dehan Eben. 

Aleinde nee, Governu Indonezia mos fo lisensa ba sidadaun Timoroan tama Indonezia ho razaun umanidade hanesan, feen kaben ou laen kaben mate.

“Ezemplu foin lalais nee, KBRI Dili fo sai vistu ba Xefe Kaza Sivil Prezidente Republika, Francisco Maria Vasconcelos viajen ba Indonezia, tanba nia feen kaben mate iha Illa Lirung, Distritu Talaud, Sulawesi Norte, Indonezia,” katak Eben Rifqy. 

Xefe Imigrasaun KBRI Dili, Eben Rifqy Taufan, neebe tinan rua resin ona halao knaar iha Timor Leste husu ba sidadaun Indonezia iha Timor Leste atu kumpre lei imigrasaun nian neebe vigora iha Indonezia nomos iha Timor Leste.

Nia informa katak, durante fulan Agostu nia laran governu Indonezia liu husi Servisu Migrasaun Atambua, Kabupaten Belu, deporta ona Timoroan hamutuk ema nain atus hitu lima (705) liu husi Pos Lintas Batas Negara (PLBN) Motaain. Servisu Migrasaun Atambua halo deporta Timoroan sira nee ba etapa dala haat (4).

Katak Eben, etapa primeiru deporta Timoroan nain 113 iha Tersa (10/08/2021), etapa segundu deporta Timoroan nain 352 iha Kinta (19/08/2021), etapa terseiru deporta Timoroan nain 164 iha Sabadu (21/08/2021), no etapa da-haat deporta Timoroan nain 76 iha Sesta (27/08/2021).

Xefe Imigrasaun Atambua KA Halim hatete, Timoroan nain 705  neebe deporta etapa haat nee liu husi PLBN Motaain, Distritu Belu, Provinsia Nusa Tenggara Timur (NTT), tanba sira tama Atambua ilegal.

Membru Arte Marsiais 50 Sei Prosesu Tuir Lei

Entretantu, Komandante Sektor Operasaun Servisu Migrasaun, Inspetur Luis do Carmo, hatete Diresaun Jeral Servisu Migrasaun halo tan identifikasaun ba sidadaun Timoroan nain lima nulu (50) neebe kompleta ona loron sanulu resin haat (14) iha kuarentena.

Antes nee, sidadaun Timoroan hirak nee hetan deportasaun husi Indonezia iha fulan kotuk ba, tanba tama ilegal iha fronteira hodi ba sae sintu iha Atambua, Indonezia.

“Ohin (Sesta-Red) ita halo tan identifikasaun ba ema nain 50 neebe kompleta ona sira nia loron 14 durante iha kuarentena. Husi total ema nain 50 nee, nain 30 ami ba foti iha Hotel Mey Yi Hudi Laran, enkuantu nain 12 foti iha Hotel Fantija, no ema nain 8 foti iha Hotel Exelcior Avenida Portugal,” dehan nia ba jornalista hafoin remata investigasaun ba membru arte marsiais iha Dili, Sesta (03/09/2021).

Tuir nia, hafoin Servisu Migrasaun konklui prosesu identifikasaun tomak mak sei entrega fali ba Servisu Investigasaun Kriminal Nasional (SIKN) hodi kontinua halo investigasaun ba prosesu kriminal nian no sei haruka ba Ministeriu Publiku hodi prosesa tuir lei.*

Reportajen: Efizenia da Costa/Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: