DILI, STLNEWS.co – Tuir Tekniku Eletricidade de Timor-Leste, Empreza Públiku (EDTL,E.P), Faustino Ximenes hatete, konsumidór sira iha Timor laran tomak, tanba instabilidade rede internet rezultadu ba sistema 3E hodi halo lentidaun, tanba nee husu mai sosa iha edifisiu EDTL, E.P.
Nia dehan, sei kliente sira hakarak sosa bele sosa iha loron, tanba loron sistema lao normal, maibe kalan internet la diak, sistema erru, tanba sira uza jaringan Telkomsel nian, laos jarigan Timor Telkom ou Telemor.
“Ita hakarak konfirma ba konsumidór sira iha Timor laran tomak, tanba instabilidade rede internet rezultadu ba sistema 3E hodi halo lentidaun ba sosa pulsa eletrisidade, tanba nee sei bele mai sosa iha edifisiu EDTL,EP nia para lalais,” hatete Faustino ba jornalista sira iha Edifisiu EDTL, EP, Kinta nee (29/03/2023).
Nia dehan, kliente sira neebe iha Munisipiu Dili bele hakat mai iha edifisiu EDTL, E.P sosa pulsa eletrisidade, atu nunee lalais liu, tanba sira sei esforsu halo manutensaun hodi reativa hikas sentru venda hotu-hotu.
“Ita husu ba kliente sira pasiensia hodi hein prosesu tomak neebe ita sei halao,” nia esplika.
Iha fatin ketak, Funsionariu Telemor Roberto da Silva informa, sistema EDTL, E.P mak erru, tanba sira uza jarigan Telkomsel, laos jaringan Telemor no Timor Telekom, tanba husu atu hadia sira nia sistema, tanba kalan-kalan sistama erru kliente forma naruk mos labele atende.
“Sira nia sistema mak la diak, tanba nee tenki hadia lalais, sei lae ita nia kliente mai forma naruk too tuku 10 hanesa nee mos ita labele atende, tanba sistema mak erru duni,” nia deklara.
Observasaun STL nian iha terenu, kalan tuku 6:00 too tuku 2 madrugada mos komunidade sei forma naruk hodi sosa pulsa eletrisidade, maibe loron hahu tuku 08:00 mai tuku 03:00 lokraik nee sistama lao diak, no sira atende kliente pulsa eletrisidade nee ho lalais.
(jen)
