Educação Mak Tali Fukun União, Ba Ema Timor Oan Sira

I. Introdução: Oinsa mak ema Timor moris hamutuk

Tuir experiências nomos basea ba história moris ita ema Timor nian, ema Timor oan sira sempre iha hakarak ida klean atu moris hamutuk. Moris hamutuk ida nebe mak kria, lori no fó hakmatek ba hotu-hotu. Ideologia ho senso humanu moris hamutuk ida be diak ba hotu-hotu, sai tiha kedas ona desejo profundo no fim ema Timor oan sira nian, iha sira ninia jornada interior hanesan ema nebe mak iha conexão ho poder divino, no hodi halao peregrinação espiritual no humana moris ne’e nian, iha mundu ida ne’e, no moris iha rai pedaço, Timor Lorosa’e. Iha ne’e, ita koko atu responde ba pergunta simples ida ne’e, oinsa mak ema Timor oan sira moris hamutuk?. Sira moris hamutuk iha no liu husi sira ninia lisan tradição no cultura nebe mak nakonu ho sabedoria, nebe mak sira nia beiala sira halo no hamoris tiha ona no husik hela ba sira, husi dresan ba dresan to’o tempu modernu ne’e. Moris hamutuk ne’e laos katak sira laiha problemas no dezafius, ne’e lae. Problemas iha nafatin, dezafius sira hasoru nafatin, maibe tuir experiências concretas no história moris ema Timor nian haktuir, ema Timor oan sira hatene oinsa mak rezolve problemas moris hamutuk nian sira, liu husi diálogo ho sentimentu hamtauk malu nian, hodi rona malu, halos lia naksala sira, to’o lalaok fó sala no sori malu, hodi simu malu nafatin hanesan ema, nebe mak haree malu katak, sira mesak feto nian deit no nan nian deit. Ne’e atitude concreta nebe mak tau tebes ema Timor oan sira hamutuk husi tempu ba tempu. Nomos oinsa mak loke an atu hasoru dezafius boboot sira moris hamutuk nian hanesan ema Timor oan, nebe mak sempre presiza malu, tamba sira iha filosofia clasica no practica ida, nebe mak dehan katak, sira la seluk no sira la le’et, sira ema ida deit. Ho nune’e, ema Timor oan sira moris hamutuk tamba iha atraição no aproximação pessoal no familiar nebe mak forte ba malu, iha lalaok no uso custome no pratika moris ema Timor nian, sira iha (kekrabatan) ou laço familiar nian ida neebe mak metin no sólida tebes. Sentimentu humanu nebe mak atrai no dada ema Timor oan sira atu aproxima malu ho sentimentu no atitude hamtauk malu nian, sai tebes base educação no formação ba moris familiar no sociedade Timor nian. Iha no liu husi uso-custome, cultura no tradição ema Timor nian, ita bele haree katak, educação atu hamtauk malu, atu promove moris, atu hahi moris no defende moris, sai tiha ona, hanesn tali fukun ba união moris ema Timor oan sira nian, iha rai pedaço Timor Lorosae ne’e. Perspectiva moris ema Timor nian katak, sira la bele moris mesak deit, sira presiza duni atu moris hamutuk ho ema seluk. Pratica no manifestação custome cultural Timor nian, hatudu momos realidade ida ne’e, realidade moris hamutuk ida nebe mak diak no fó hakmatek ba hotu-hotu. Desejo moris diak no hakmatek hamutuk ne’e katak, desejo hakarak educa no forma malu atu sai ema nebe mak iha duni dignidade, hatene valores moris nian, no hakarak halo moris ne’e sai diak hela deit ba nafatin. Desejo atu sai pessoa educada no formada, mai kedas ona husi abut tradição no cultura moris familiar no sociedade ema timor nian, tamba sira sempre iha perspectiva ida ba oin ba futuro ida nebe mak tem que sai diak liu tan. Perspektiva ida ne’e duni, mak resistência interior moris hamutuk nebe mak diak nakonu ho hakmatek em geral iha ema timor nia an. Tamba ne’e wainhira, ita koalia kona ba educação hanesan tali fukun união ema timor nian, iha duni ninia base tradição no cultural. Assunto educação ne’e duni mak continua tem que sai elemento ida nebe mak forte atu tau nafatin timor oan sira hamutuk. Tuir mai ita sei hare educação hanesan abut no meta, be sei tau hamutuk Timor Oan sira iha futuro no hadaet mos ho elementos sel-seluk nebe mak tau 2 ema timor oan sira hamutuk, hanesan duni ema timor oan, iha história moris no existência ema timor nian.

II. Educação mak abut no meta

Educação mak abut no meta, neebe sei tau hamutuk Timor Oan sira iha futuro. Laiha duvida ba timor oan barak, atu simu visão ida ne’e, katak Educação ne’e duni, mak abut no meta be tem que sai força ida be unifica ou tau timor oan sira hamutuk iha tempo presente no liu-liu tan iha futuro. Se hahu agora mak ita la concentra ba elemento essecial ida ne’e, mak iha futuro mai, ita sei hasoru problemas oi-oin no desafios todan bar-barak. Educação ida nebe mak diak, metin, sólida, estruturada no contextualizada precisa tebes iha ita nia moris hanesan ema timor moderna no ema timor nebe mak, sei continua moris ne’e iha futuro, ho geração nebe mak sei mai. Educação mak elemento chave unificante timor oan nian. Laiha educação nebe mak diak, metin, integrado, sólida, estruturada no contextualizada, Timor Leste, hanesan nação, pátria, sociedade no liu-liu hanesan povo, karik sei la existe iha futuro. Timor Leste ninia existência no ninia ser hanesan Timor Leste iha futuro sei sai pergunta bo’ot ida, se laiha educação ida nebe mak cria nova imaginação hodi fó novo horizonte ba timor oan sira, atu hare ba futuro ho nova visão ida nebe certa, adequada no contextualizada. Timor Leste, precisa tebes nova inovações. Relaciona ho assunto ida ne’e, iha ne’e colaboração máxima no inclussiva husi parte hotu-hotu campo educativo nian, iha Timor Leste, necessária tebes, liu-liu husi parte Igreja Católica nian. Atu hadia, promove, hametin desenvolvimento educativo no formativo iha Timor Leste, estado no governo nebe deit, husi partido político saida deit, iha contexto Timor Leste nian, tem que sempre conta no colabora hamutuk ho Igreja Católica, ne’e assunto inegociavel ida ou (non-negotiable matter). Tuir mai, se Timor Leste hakarak halo didiak ninia sistema educativo no formativo nian ba futuro sociedade timorensa ida nian, nebe mak sei sai educado no civilizado liu, ho no iha ninia contexto futurístico nian, Timor Leste precisa tebes apreende nomos adopta sistema educativo no formativo pelo menos husi rai ou nações rua ne’e Singapura no Finlandia. Ita hanesan ema timor no liu-liu tan hanesan ema católica tem que sai pessoas da esperança, no buka atu hari futuro ida nakonu mos ho esperança, liu-liu iha mundo educativo nian. Ne’e katak, ita buka atu ho haraik an no loke an, hodi apreende husi nações seluk, liu-liu nações rua, be mencionadas iha ne’e. Bele mos, ita precisa duni ona, atu halo renovação total ba sistema educativo no ninia estrutura tomak inclui ninia política, iha mundo educação iha contexto Timor Leste. Iha ne’e inclui mos renovação total ba sistema educativo no ninia estrutura tomak iha mundo educação iha contexto Igreja Católica nian, iha Timor Leste. Defacto ne’e la fasil, maibe tem que hahu hanoin, sente, tetu, imagina no mehi. No ita tem que mehi no deseja hamutuk, se ita hakrak hadia tebes sistema educativo iha ita nia pais Timor Leste ida ne’e. Hadaet ho assunto educação ne’e, ita buka nafatin atu iha convicção comum ida, katak wainhira ita educa no forma ema, laos atu ita educa no forma ema ne’e atu hatene buat barak, no atu halo buat oi-oin deit, ne’e lae. Maibe liu-liu atu ema ho ninia hatene buat barak, hatene ho klean, domina ho ninia capacidade tomak, bele halo buat oi-oin, ho sabedoria. Ne’e katak, ita educa no forma ema ne’e, atu iha ninia moris tomak nia sai tebes ema sabia ida, ema ida nebe mak iha duni sabedoria. Se nune’e duni, ita sei forma no cria duni humanidade no sociedade ida nebe mak educada no civilizada. Ne’e processo naruk ida, e processo ida ne’e ita nia beiala sira hahu tiha ona, husik hela mai ita, ita mos halao hela daudaun, no tem que continua halao no hadiak liu tan, tuir exigência mundo no tempo nian. Assunto importante ida be, ita buka hakas an atu halakon lalais mak, la bele politiza demais campo ou mundo educação nian. Wainhira, ita politiza hela deit mundo educativo, ita hotu parado no estagnado. Ho nune’e, sei laiha desenvolvimento, mudanca no sei laiha nova civilização husi mundo educativo ne’e rasik.

III. Além de Educação

Além de Educação,iha mos elementos seluk be unifica Timor oan sira. Iha ne’e ita hakarak reflecte hamutuk fali, hare ba realidade histórica no geografica nian, ita hakarak reconhece no simu mos katak além de educação, iha mos elementos praticos sira seluk, maibe mos essencial, nebe mak unifica ou tau ita timor oan sira hamutuk hanesan timor oan iha história no existência ita nia identidade hanesan ema Timor.

  • Primeiro elemeto Geografico: Fisicamente ou materialmente, Rai Timor ne’e rasik. Pedaço da Ilha Timor, rai timor ne’e, ho ninia histórias e lendas tau timor oan sira hamutuk.
  • Elemento atropologico: Ita hotu hanesan ema, ita iha ita nia senso humano. Ita ne’e ema nebe mak iha dignidade hanesan ema. Ema hakarak moris diak no moris hamutuk ho ema seluk. Hanesan ema ita iha desejo profundo ida ne’e, katak ita hakarak duni moris hamutuk ho ema seluk, dimensão besik malu metin liu tan (kekrabatan), tau ita hamutuk.
  • Elemento cultural: Ita ema Timor oan hatene kona ba saida mak: Uma Lulik, Uma Lisan, Uma Kain. Pratica cultural, fet-san – umane. Lia moris no lia mate. Tais feto no tais mane. Folin, sori malu ho osan, materia no ho animal. Elemento cultural simples ida ne’e mos tau ita ema timor oan sira hamutuk.
  • Elemento linguistico: Lingua Tetum. Lingua tetum, de facto tau ita timor oan sira hamutuk, iha ita nia moris loro-loron hanesan ema timor oan, nebe mak diferente husi ema seluk, relaciona ho assuntu comunicação nian. Lingua tetum sai tebes lingua franca no lingua da unidade nacional mai ita hotu.
  • Elemento Religioso: Igreja Católica. Ita, tem que reconhece katak iha ita ninia história de evangelização no catolização iha rai doben Timor Leste, doutrina no fé Igreja Católica nian mos, tau ita hamutuk hanesan ema Timor oan, nebe mak simu wé batismo husi Kreda ida, nebe mak fiar iha Na’i ida deit, be Kreda Católica haklaken mak Jesus Cristo. Então ho nune’e, ita la bele nega katak em geral Igreja Católica ne’e, tau timor oan sira hamutuk duni, iha sira ninia moris peregrinação fiar nian, hanesan ema Timor oan.
  • Elemento Histórico: Colonizado husi Portugal. Presença Portugal nian durante quase tinan 500, fó ninia influéncia cultural ida nebe mak forte. Hanesan ho lingua portuguesa, nebe mak influencias makas lian tetum praça, aspectos culturais kikuan sira hanesan musicas, dancas, estilo de vida, formação base ba elite kikuan iha Timor Leste, fó ninia valor plus no sabor diferente ida mai ita timor oan sira, iha continente asiatico. Liu-liu iha dimensão reiqueza e beleza de “encontro das culturas” entre, cultura timorensa rasik no portuguesa nian. Ita buka atu reconhece no simu katak, sim iha aspectos positivos husi processo de encontro das culturas ida ne’e. Parte ida ne’e, ita bele dehan mos cultura portuguesa hariku cultura timorensa iha ninia aspecto variedade de beleza nian.
  • Elemento Político e psicologia: Invazão Indonesia nian, experiência de sofrimento ka terus nian durante tinan 24, experiência luta ba libertação da pátria de facto sai mos hanesan elemento importante ida be, tau hamutuk Timor oan sira hamutuk, iha passado, hein katak mos continuando ser sentido iha tempo presente agora ne’e, no iha futuru. Ita rasik lakohi ema hanehan ita nia ulun no sama ita nia ain. Sonho (mehi), desejo (hakarak) no saudades (kerinduan) de libertação ida be lori moris diak ba timor oan hotu, sai tebes klamar no espírito ba luta no saran an nian husi timor oan barak, nebe mak mos tau timor oan sira hamutuk. Ita hanesan ema iha dignidade, direitos, deveres, valores, atu moris hanesan duni ema. Ita iha mehi ida luta ba interesse atu ita nia dignidade hanesan ema ne’e ser reconhecido, no nune’e duni acontece. Elemento ida ne’e “plays important rule ka memainkan peranan penting” ,iha ita nia existência hanesan pátria, nação e povo livre ida. Ho nune’e espirito da luta no experiencia terus nian ne’e, tau tebes ita hamutuk.
  • Elemento diplomácia e globalização: Referendum 30 de Agosto no Restauração da Independência, sai hanesan cume ka clímax ba esforço tomak saran an povo ida nian ba libertação total. Ho diplomácia iha alto nivel liu husi maneiras oi-oin, nebe mak hadaet mos ho CNRT: Conselho Nacional da Resistência Timorensa, iha level la hanesan, nebe mak liga ba globalização da interesse no apoio, lori ita hamutuk hodi sente katak, ita la terus mesak, ema barak iha mundo globalizado ida ne’e, hare no sente hela ita nia luta no ita nia sofrimento. Diplomácia iha mundo ida nebe mak globalizado lori tebes “sense of belonging ida ba malu” katak, humanidade precisa duni tulun malu liu-liu wainhira haosru todan no terus. Elemento ida tau tebes ita hamutuk, katak ita hotu luta ho meta ida hanesan mak liberdade no independencia mak dalan ida diak liu ba timor oan hotu-hotu.
  • Elemento Educativo: E própria projecto da educação popular ida nebe mak solida no qualitativa hanesan menciona tiha ona iha parte segunda, sai tebes elemento chave, base e fundamental ba uniao timor oan sira hotu nian, liu-liu iha tempo presente no futuro nian. Sem elemento ida ne’e, katak educacao, elemento sira seluk be menciona no reflectido iha reflexao ida ne’e, iha leten ne’e sei bele lakon sira nia sentido.

IV. Conclusão: Reflexão hamutuk.

Como que ita hare lissões no valores husi elementos sira ne’e hotu, nebe mak afecta ita nia moris hanesan ema Timor oan iha tempo presente no futuro?. Lissões no valores husi elementos sira ne’e, sei tau ita hamutuk duni?. Oinsa ita halo conscientização popular, conscientização massa ida, kona ba elementos sira be tau ita timor oan hamutuk, liu-liu tan elemento Educação nian ne’e?, Atu ita timor oan hotu, sente ser chamado no ser responsabilizado atu halo buat ruma, ho maneiras sira nebe mak mais activa, criativa, productiva no concreta, hodi move ita nia sociedade ba novo horizonte, nova imaginação ida, katak sim, timor oan hotu-hotu, tem que hetan no simu duni educação ida nebe mak diak, sólida, contextualizada, atu lori sociedade timorensa ida ne’e, ba moris ida be ho valor civilização ida be mais humana e mais timorensa e cristã. Oinsa, timor oan sira hotu, hamrik hakilar hamutuk, ho mehi no fiar ida hanesan, katak EDUCAÇÃO IDA NEBE DIAK NO SÓLIDA, mak TALI FUKUN UNIÃO NO UNIDADE TIMOR OAN HOTU-HOTU nian, iha presente no futuro. Hau no ita hotu fiar katak, ita timor oan sira, bele halo mudança no reformação total ba ita ninia sistema da educação ida nebe mak, educa ema atu sai ema liu tan, ema nebe mak laos deit matenek no domina ninia campo, maibe mos sai ema nebe mak iha sabedoria no compaixão, atu sai tebes ema culta no civilizada, iha aspectos hotuhotu moris ne’e nian. Ita mos buka hakas an, atu halakon lalais tiha politização no “businesszação” mundo educativo nian iha Timor Leste laran tomak. Ita fiar katak ho educação nebe mak diak duni, ita bele cria iha ita ema timor oan sira nia hanoin imaginação foun no bele mos hamenos lalais pobreza moris ita ema nian. Maiba, ita buka atu lez ita nia fuan no ita nia consciência hodi halo buat ruma foun, timorensa, humana no cristã, iha ita nia terra natal, pátria amada, nação salvada Timor Leste terra da Santa Cruz. Obrigado e boa reflexão.

Pe. Venâncio da Costa Pereira, S.J.

Dili, 2 de Setembro de 2021.

Bersambung………………..

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Vasina Pfizer Importante Ba Labarik Sira

DILI, STLNEWS.co – Tuir Ministra Saude Odete Maria Freitas Belo dehan, labarik sira presiza simu vasina Pfizer nee, tanba importante tebes hodi bele prevene moras...

Update Covid-19 TL 27 Outubru: Kazu Pozitivu 7 & Rekuperadu Nain 3

DILI, STLNEWS.co – Ohin loron 27 fulan Outubru tinan 2021, liu husi Centro Integrado Gestão de Crises, Sala Situação (CIGC-SS) rejistu tan kazu konfirmadu...

Estudante ESJ Simu Ona Vasina Pfizer

DILI, STLNEWS.co – Eskola Ensinu Sekundariu Jeral (ESJ) 4 Setembru simu ona vasina Pfizer ba doze primeiru, atu nunee bele halo prevensaun ba Covid-19. Informa...