Ekipa Mama Bolu PNTL Desinfekta Edifisiu PG

Ekipa voluntariu neebe ho naran Mama Bolu hamutuk ho PNTL Munisipiu Dili, Sesta Feira nee dezinfekta ona edifisiu Palasiu Governu (PG). (Foto: STL/Alberto Menezes)

DILI, STLNEWS.co – Ekipa voluntariu neebe ho naran Mama Bolu hamutuk ho PNTL Munisipiu Dili, Sesta Feira nee dezinfekta ona edifisiu Palasiu Governu (PG).

Tuir Segundu Komandante Munisipiu Dili, Superintendente Euclides Belo hanesan mos membru ba ekipa Mama Bolu hateten, ekipa Mama Bolu desinfekta edifisiu Palasiu Governu, tanba hetan kontaktu husi gabineti SECOMS.

“Asaun desinfekta ba edifisiu Palasiu neebe halao husi ekipa Mama Bolu ho membru PNTL, tanba hetan kontaktu husi gabineti SECOMS neebe mak iha Palasiu Governu nee, para bele minimiza transmisaun moras Covid-19, nunee garante nafatin funsionariu sira nia vontade servisu hodi atende nesesidade povu nian,” dehan Segundu Komandante Munisipiu Dili nee wainhira remata desinfekta edifisiu Palasiu Governu, Sabadu (27/03/2021).

Nia dehan, Komandu Polisia Munisipiu Dili apoiu tebes asaun neebe ekipa halo hodi desinfekta edifisiu no fatin publiku sira iha kapital Dili nee.

Euclides hateten, ekipa Mama Bolu neebe koopera ho PNTL prontu atu halo desinfekta iha edifisiu minesteriu ga fatin publiku neebe deit wainhira hetan kontaktu.

Iha fatin hanesan, membru ekipa voluntariu Mama Bolu, atual Prezidente Partidu Demokratiku, Mariano Assanami Sabino katak, hakarak partisipa iha atividade sira hanesan nee para bele fo nafatin espiritu ba foin sae sira katak iha sitausaun defisil sira hanesan Covid-19 nee presiza ema hotu nia hamutuk hodi luta hasoru moras nee.

“Hanesan jerasaun foun ba nasaun nian presiza fo solidariu ba malu liu husi envolve an iha grupu Mama Bolu hodi proteje moras Covid-19 nee labele daet ba ema hotu,” nia esplika.

Nia hatutan, maske asaun nee kiik maibe sei implementa ba iha Dili laran tomak hodi proteje edifisiu sira neebe ema barak husi moras Covid-19.*

Reportajen: Alberto Menezes
Editora: Ekipa STL

LEAVE A REPLY

Please enter your comment!
Please enter your name here