DILI, STLNEWS.co – Bainhira ekipamentus hanesan komputador avaria, mak formasaun ba joven sira iha organizasaun AHISAUN paradu kuaze tinan ida ona.
Haktuir Antoninho da Silva Soares nudar membru organizasaun AHISAUN ba STL iha nia knaar fatin Fatuhada, Dili, Kinta nee (16/03/2023).
“Iha nee formasaun english no komputador, nunee mos haruka maluk defisiensia sira kontinua sita nia estudu iha nivel ensinu superior, nunee mos AHISAUN loke eskola formal ida iha Metinaro, nee konaba tekniku vokasional ninia. Maski durante nee AHISAUN iha formasaun ba ita nian joven sira, maibe iha tinan 2022 ho tinan ida nee sei paradu hela, tanba ekipamentus hanesan komputador avaria ka aat hotu,” nia afirma.
Antoninho dehan, ho komputador neebe aat, formasaun iha area edukasaun non formal paradu, tanba agora sira sei halo hela proposta ba ministeriu relevante, oinsa tau fali ekipamentus sira nee hodi kontinua fo formasaun.
“Iha tinan 2022 nee ami fo formasaun deit ba maluk defisiensia, tanba ami nian komputador iha laran lima, maibe agora aat hotu, antes nee ami fo formasaun komputador no tekvo ba ita nian joven no maluk defisiensia sira, ho ida nee, tinan nee ho ekipamentus neebe aat, ami labele simu ita nian joven sira, no ami fo deit ba ami nia maluk defisiensia sira,” katak nia.
(jac)
